ساياساتتانۋشى مارات شيبۇتوۆ بولاشاق ءبىرپالاتالى پارلامەنت – قۇرىلتايدى تاراتۋ مۇمكىندىگى تۋرالى كونستيتۋسيالىق نورمانى نەعۇرلىم ەگجەي-تەگجەيلى تۇجىرىمداۋدى ۇسىندى. ول ءوز پىكىرىن كونستيتۋسيالىق رەفورما جونىندەگى كوميسسيانىڭ ونىنشى وتىرىسىندا ءبىلدىردى.
مارات شيبۇتوۆ قۇرىلتاي ءبىرقاتار جوعارى لاۋازىمدى تۇلعالاردى تاعايىنداۋدى كەلىسۋگە قۇقىلى ەكەنىن ايتتى. ولاردىڭ قاتارىندا ۆيسە-پرەزيدەنت، پرەمەر-مينيستر، كونستيتۋسيالىق سوتتىڭ 10 سۋدياسى، ورتالىق سايلاۋ كوميسسياسىنىڭ 6 مۇشەسى جانە جوعارى اۋديتورلىق پالاتانىڭ 8 مۇشەسى بار. ياعني، قازىرگىدەن الدەقايدا كوپ.
مارات شيبۇتوۆ پارلامەنتتى تاراتۋ تەتىكتەرىن نەعۇرلىم يكەمدى جانە ىمىراعا كەلۋگە مۇمكىندىك بەرەتىندەي ەتۋدى ۇسىندى.
«تاراتادى» دەگەن ءسوزدىڭ ورنىنا مەن ۇزىلدى-كەسىلدىلىكتى الىپ تاستاپ، كەلىسىمگە كەلۋ مۇمكىندىگىن قالدىرىپ، «تاراتۋعا قۇقىلى» دەگەندى قولدانۋدى ۇسىنامىن. بۇل «پرەزيدەنت» بولىمىندەگى 46-باپتىڭ 2، 4، 8-تارماقتارىنا جانە «قۇرىلتاي» بولىمىندەگى 62-باپتىڭ 1، 2-تارماقتارىنا قاتىستى. وسىلايشا، ءبىز ساياسي جۇيەنى يكەمدى جانە ىمىراعا كەلۋگە بەيىم ەتەمىز. قۇرمەتتى كوميسسيا، مەنىڭ ۇسىنىسىمدى قولداۋدى سۇرايمىن»، – دەدى ول.
ساياساتتانۋشى سونداي-اق ق ر جاڭا كونستيتۋسياسىنا ۇسىنىلعان ءاربىر تۇجىرىم كونستيتۋسيالىق كوميسسيادا قىزۋ تالقىلاۋدان ءوتىپ، اشىق قوعامدىق باعالاۋمەن سۇيەمەلدەنگەنىن اتاپ ءوتتى.
«بۇل كۇردەلى، كەيدە ىڭعايسىز، ءبىراق ادال ۇدەرىس بولدى. ناتيجەسىندە، قازىرگى كەزەڭدە بىزدە ءتۇرلى سالا ساراپشىلارىنىڭ بىرلەسكەن ەڭبەگى مەن ءارتۇرلى ۇستانىم، تاجىريبە مەن دۇنيەتانىمىنىڭ ناتيجەسى بولىپ تابىلاتىن جوبا بار. سوندىقتان دا اتا زاڭ جوباسى جالپىحالىقتىق داۋىس بەرۋگە شىعارۋعا دايىن دەپ سانايمىن»، – دەپ قورىتىندىلادى مارات شيبۇتوۆ.
