ءماجىلىس دەپۋتاتى، «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى باقتىعوجا ىزمۇحامبەتوۆ جاڭا كونستيتۋسيا جوباسىنا ەگدە ادامدارعا قاتىستى قانداي ماڭىزدى نورمالار ەنگەنىن ايتىپ بەردى.
«جاڭا كونستيتۋتسيا جوباسىندا ءاربىر ازاماتقا جالاقى مەن زەينەتاقىنىڭ ەڭ تومەن مولشەرىنە، جاسىنا، ناۋقاستانۋىنا نەمەسە مۇگەدەكتىگىنە بايلانىستى الەۋمەتتىك قامسىزداندىرۋعا تىكەلەي كەپىلدىك بەرىلگەن. سونىمەن بىرگە، مەملەكەت الەۋمەتتىك قامسىزداندىرۋدىڭ جانە قايرىمدىلىقتىڭ ءتۇرلى نىساندارىن دامىتۋعا جاردەمدەسۋ مىندەتىن الىپ وتىر، بۇل ەگدە جاستاعى ادامدار ءۇشىن قوسىمشا قاۋىپسىزدىك بەرەدى»، – دەدى باقتىعوجا ىزمۇحامبەتوۆ كونستيتۋسيالىق كوميسسيا X وتىرىسىندا.
كونستۋسيانىڭ جاڭا جوباسىندا پرەامبۋلاعا تاريحي-مادەني مۇرانى ساقتاۋ مەن ۇلتتىق مادەنيەتتى قولداۋ − مەملەكەتتىك قىزمەتتىڭ نەگىزگى قاعيدالارىنىڭ ءبىرى دەگەن تۇجىرىم ەنگىزىلدى. وسىلايشا ەل بولاشاعىن قالىپتاستىرۋدا، ەڭ الدىمەن جيناقتالعان ءبىلىم، تاجىريبە جانە تاربيەنى ۇرپاققا جەتكىزۋ ارقىلى اعا بۋىننىڭ ايرىقشا ءرولى مويىندالىپ وتىر.
«بۇرىنعى كونسۋلتاتيۆتىك قۇرىلىمداردىڭ ورنىنا «قازاقستاننىڭ حالىق كەڭەسى» قۇرىلىپ، قۇرامىنا بارلىق وڭىرلەردىڭ وكىلدەرى ەنەدى. بۇل دا اعا بۋىنعا ماڭىزدى مەملەكەتتىك شەشىمدەر مەن زاڭداردى تالقىلاۋعا قاتىسۋ مۇمكىندىگىن بەرەدى»، – دەيدى دەپۋتات.
اعا بۋىن ءۇشىن ماڭىزدى تارماق − كامەلەتكە تولعان ەڭبەككە قابىلەتتى بالالاردىڭ ەڭبەككە جارامسىز اتا-انالارىنا قامقورلىق جاساۋ مىندەتىن كونستيتۋسيادا بەكىتۋ ۇرپاقتار ساباقتاستىعى مەن وتباسىلىق ىنتىماقتاستىقتى كۇشەيتەدى.
جاڭا كونستيتۋسيا جوباسى ازاماتتاردىڭ جەكە قاراجاتى مەن ءومىرىن قورعاۋدى دا كۇشەيتەدى. مەملەكەت بانك سالىمداردىڭ، جيناقتاردىڭ ساقتالۋىنا جانە قارجىلىق وپەراسيالاردىڭ قۇپيا بولۋىنا كەپىلدىك بەرەدى.
«وندا جەكە دەرەكتەردى الاياقتاردان جانە زاڭسىز پايدالانۋدان، ونىڭ ىشىندە ينتەرنەت-كەڭىستىكتە قورعاۋ جەكە نورما بولىپ بەكىتىلەدى. بۇل سيفرلىق تەحنولوگيالاردى پايدالانا المايتىن جانە مەملەكەتتىك قىزمەتتەردى، مەديسينالىق كومەكتى الۋ نەمەسە قارجىلىق وپەراسيا جۇرگىزۋدە سىن-قاتەرگە ءجيى تاپ بولاتىن ەگدە ادامدار ءۇشىن ەرەكشە ماڭىزدى»، – دەپ تولىقتىردى ارداگەرلەر ۇيىمىنىڭ ءتوراعاسى.
سونداي-اق، ەل ارداگەرلەرى 3-باپتا جوعارى ەكولوگيالىق مادەنيەتتى قالىپتاستىرۋ جانە تابيعاتقا ۇقىپتى قاراۋ قاعيداتىنىڭ العاش رەت كونستيتۋسيالىق دەڭگەيدە بەكىتىلگەنىنە دە ريزا.
ءسوز سوڭىندا باقتىعوجا ىزمۇحامبەتوۆ ارداگەرلەر قاۋىمى وسى ازىرلەنگەن كونستيتۋسيا جوباسىن قولدايتىنىن جەتكىزدى.
