كونستيتۋسيالىق رەفورما جونىندەگى كوميسسيانىڭ 12ء-شى وتىرىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «Respubliسa» پارتياسى فراكسياسىنىڭ جەتەكشىسى ايداربەك قوجانازاروۆ جاڭا كونستيتۋسيا جوباسىن قولدايتىنىن مالىمدەدى جانە ونىڭ ەلىمىزدىڭ ارى قاراي دامۋى ءۇشىن ستراتەگيالىق ماڭىزعا يە ەكەنىن اتاپ ءوتتى.
«ۇسىنىلىپ وتىرعان كونستيتۋسيا جوباسى دايىن ۇلگىلەردىڭ كوشىرمەسى ەمەس. ءيا، ءبىز حالىقارالىق تاجىريبەنى زەردەلەپ، كاسىبي قاۋىمداستىقپەن كەڭەستىك. الايدا تۇپكىلىكتى ءماتىن – دەربەس تاڭداۋىمىزدىڭ ناتيجەسى. ول ءبىزدىڭ قوعامنىڭ قۇندىلىق نەگىزدەرىن بەينەلەيدى، تاريحي ساباقتاستىقتى ساقتايدى ءارى جاڭا سىن-قاتەرلەردى ەسكەرەدى»، – دەدى دەپۋتات.
قۇجاتتىڭ مازمۇنى تۋرالى توقتالعان قوجانازاروۆ ەگەمەندىكتىڭ يەسى ءارى بيلىكتىڭ بىردەن-بىر باستاۋى – حالىق ەكەنىن اتاپ ءوتتى. مەملەكەتتىڭ تۇراقتىلىعى كەلىسىم مەن ىنتىماققا نەگىزدەلەدى. ونىڭ ايتۋىنشا، بولاشاق دامۋ باعىتتارى مەن سيفرلىق ترانسفورماسياعا ەرەكشە كوڭىل بولىنگەن. سونىمەن قاتار ول باسقارۋ قۇرىلىمىنداعى وزگەرىستەرگە دە توقتالدى.
«ءبىر پالاتالى پارلامەنت – قۇرىلتاي قالىپتاستىرىلادى، ونىڭ باقىلاۋ فۋنكسيالارى كۇشەيتىلەدى. پارتيالاردىڭ ماڭىزى ارتىپ، ولاردىڭ قوعام الدىنداعى ساياسي جاۋاپكەرشىلىگى كۇشەيەدى. بۇل قادامدار ينستيتۋسيونالدىق تەپە-تەڭدىكتى قامتاماسىز ەتۋگە باعىتتالعان»، – دەدى فراكسيا جەتەكشىسى.
ءسوز سوڭىندا ايداربەك قوجانازاروۆ جاڭا اتا زاڭ ۇزاق مەرزىمدى ينستيتۋسيونالدىق جاڭعىرۋ قۇرالى ەكەنىن جەتكىزدى.
«جالپى العاندا، جاڭا كونستيتۋسيا – جاي عانا قۇقىقتىق قۇجات ەمەس. بۇل – ينستيتۋتتاردى جاڭارتۋعا ارنالعان قۇرال. ءبىز وكىلەتتىك پەن جاۋاپكەرشىلىك اراسىنداعى سايكەستىك، ستراتەگيالىق جاۋاپكەرشىلىك پەن قوعامدىق سەنىم قالىپتى قاعيداعا اينالاتىن، مىقتى، ادىلەتتى ءارى تۇراقتى قازاقستاننىڭ نەگىزىن قالايمىز»، – دەپ تۇيىندەدى ول.
