جاڭا كونستيتۋسيا جوباسى مەملەكەتتىڭ الەۋمەتتىك سيپاتىن كۇشەيتىپ، ساياساتتىڭ وزەگىنە ادامدى قويا وتىرىپ، ازاماتتاردىڭ قوعامدىق ومىرگە بەلسەندى قاتىسۋ مۇمكىندىگىن كەڭەيتەدى. كونستيتۋسيالىق رەفورما جونىندەگى كوميسسيانىڭ كەزەكتى وتىرىسىندا اتا زاڭ جوباسىن قولداۋ جونىندەگى ۇستانىمى مەن دايەكتەرىن جالپىۇلتتىق سوسيال-دەموكراتيالىق پارتياسىنىڭ ءتوراعاسى اسحات راحىمجانوۆ مالىمدەدى.
ول كونستيتۋسيا جوباسى ەڭ الدىمەن ادىلدىككە، تەڭدىككە، قۇقىقتاردى قورعاۋعا جانە مەملەكەتتىڭ حالىق الدىنداعى جاۋاپكەرشىلىگىن ارتتىرۋعا باعىتتالعانىن اتاپ ءوتتى.
«قوعامدىق بىرلەستىكتەردىڭ قىزمەت ەتۋ ەركىندىگىن بەكىتۋ جانە ازاماتتاردىڭ قوعامدىق ومىرگە قاتىسۋ اياسىن كەڭەيتۋ – ناعىز ازاماتتىق قوعامدى دامىتۋعا جول اشادى. مۇنداي قوعامدا كاسىپوداقتار، قوعامدىق ۇيىمدار مەن باستاماشىل توپتار ەڭبەك ادامدارىنىڭ، جاستاردىڭ جانە الەۋمەتتىك وسال ساناتتاعى ازاماتتاردىڭ مۇددەلەرىن ەركىن قورعاي الادى. بۇل – تەڭ مۇمكىندىكتەر مەن مەملەكەتتىڭ الەۋمەتتىك جاۋاپكەرشىلىگى قاعيداتتارىمەن تىكەلەي بايلانىستى»، – دەدى جسدپ ءتوراعاسى.
سونىمەن قاتار، اسحات راحىمجانوۆ وسىناۋ كونستيتۋسيالىق نورمالار ماڭىزى ادام مۇددەسىنە باعدارلانعان ورنىقتى ساياساتتىڭ نەگىزىن قالىپتاستىرۋ ءۇشىن ماڭىزدى ەكەنىن جەتكىزدى.
«مەملەكەتتىك شەشىمدەر قابىلدانعاندا بولاشاق ۇرپاقتىڭ مۇددەسى مىندەتتى تۇردە ەسكەرىلۋى كەرەك. اسىرەسە ەڭبەك، جۇمىسپەن قامتۋ، ەكولوگيا جانە الەۋمەتتىك قورعاۋ سالالارىندا بۇل وتە ماڭىزدى. وسىعان بايلانىستى ۇسىنىلىپ وتىرعان كونستيتۋسيالىق نورمالار تۇراقتى ءارى ادام مۇددەسىن باستى ورىنعا قوياتىن ساياساتتىڭ نەگىزىن قالىپتاستىرادى»، – دەپ تۇيىندەدى ءسوزىن كوميسسيا مۇشەسى.
