الماتىدا «Alatau-Aqparat» مەدياحولدينگى مەن قىرعىز ۇلتتىق «كابار» اقپاراتتىق اگەنتتىگى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. بۇل ماڭىزدى قۇجات قوس ەلدىڭ مەديا كەڭىستىگىن جاقىنداستىرىپ، اقپاراتتىق سەرىكتەستىكتى جاڭا دەڭگەيگە كوتەرەدى.
سالتاناتتى ءىس-شارادا قىرعىز رەسپۋبليكاسىنىڭ باس كونسۋلى جەنيشبەك اسانكۋلوۆ «مەملەكەت باسشىلارى قاسىم-جومارت توقايەۆ پەن سادىر جاپاروۆتىڭ جەتەكشىلىگىمەن ەكىجاقتى بايلانىس بارلىق سالادا قارقىن الىپ كەلەدى. بۇل مەموراندۋم – باۋىرلاستىقتىڭ كەزەكتى ءبىر جارقىن كورىنىسى. الماتى ءوڭىرى – قىرعىز ەلى ءۇشىن ستراتەگيالىق ءارى رۋحاني ماڭىزى بار ايماق. ءبىز اقپارات سالاسىنداعى بايلانىستاردىڭ ارتاتىنىنا قۋانامىز»، – دەدى.
«كابار» اگەنتتىگىنىڭ ديرەكتورى مەدەربەك شەرمەتالييەۆ تە بۇل ارىپتەستىكتى جوعارى باعالاپ، بولاشاق بىرلەسكەن جوبالار تۋرالى پىكىر ءبىلدىردى.
- قازاقستان رەسپۋبليكاسىنىڭ «Alatau Aqparat» مەدياحولدينگى مەن قىرعىز ۇلتتىق «كابار» اگەنتتىگى ءوزارا ىنتىماقتاستىق تۋرالى كەلىسىم جاسادى. مەنىڭشە، بۇل كەلىسىم ەكى جاققا دا جەمىستى بولادى. سەبەبى ءبىز ورتالىق ازيا وڭىردەگى تۋىسقان حالىقتارمىز جانە اقپارات تاراتۋدا تىعىز ىنتىماقتاستىقتا جۇمىس ىستەۋىمىز كەرەك. ءقازىر ءوزارا بايلانىس ورناتتىق، ەندى جۇمىسىمىز ناتيجەلى بولادى دەپ ۇمىتتەنەمىز، – دەدى مەدەربەك شەرمەتالييەۆ.
«Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى «ەجەلدەن ەنشىسى بولىنبەگەن ەكى ەلدىڭ ب ا ق سالاسىنداعى بايلانىسى وتە ماڭىزدى. جاھاندانعان داۋىردە ەڭ جاقىن باۋىر ءارى كورشى ەلمەن اسىرەسە، اقپارات سالاسىنداعى بىرلىك، تۇسىنىستىك پەن قولداۋدى ارتتىرۋ زامان تالابى. بىر-بىرىمىزدەن ۇيرەنەتىن ءارى بىر-بىرىمىزگە ۇيرەتەتىن دۇنيەلەر كوپ»، – دەدى.
مەموراندۋمدا بىرلەسكەن مەديا جوبالاردى جۇزەگە اسىرۋ، تاجىريبە الماسۋ، جۋرناليستەرگە ارنالعان دوڭگەلەك ۇستەلدەر، كونفەرەنسيالار مەن وقىتۋ باعدارلامالارىن ۇيىمداستىرۋ سىندى باعىتتار قامتىلعان.
قوناقتار مەدياحولدينگتىڭ پودكاست ستۋدياسى مەن مۋزەيىن ارالاپ، ۇجىمنىڭ جۇمىس پروسەسىمەن تانىستى.
1937 جىلى قۇرىلعان «كابار» – قىرعىزستانداعى العاشقى ءارى باستى مەملەكەتتىك اقپارات اگەنتتىگى. بۇگىندە ول قىرعىز، ورىس، اعىلشىن، اراب، تۇرىك جانە جۇڭگو تىلدەرىندە اقپارات تاراتادى. ول الەمنىڭ جەتەكشى اقپارات اگەنتتىكتەرىمەن سەرىكتەستىك ورناتىپ، حالىقارالىق اقپاراتتىق كەڭىستىكتە بەلسەندى جۇمىس جۇرگىزىپ كەلەدى.
ال 2020 جىلى قۇرىلعان «Alatau Aqparat» مەدياحولدينگى – الماتى قالاسىنداعى جەتەكشى مەديا قۇرىلىم. ونىڭ قۇرامىنا 1936 جىلدان شىعىپ كەلە جاتقان «ۆەچەرنيي الماتى»، 1988 جىلدان شىعىپ كەلە جاتقان «الماتى اقشامى» گازەتتەرى مەن aqshamnews.kz، vecher.kz جانە alnews.kz اقپاراتىق رەسۋرستارى كىرەدى.
