الماتىدا جاڭا فورماتتا قىزمەت كورسەتۋگە باعىتتالعان العاشقى پوليسيا پۋنكتتەرى پيلوتتىق رەجيمدە ىسكە قوسىلدى، - دەپ حابارلايدى alnews.
جوبانى مەملەكەت باسشىسىنىڭ پوليسيا جۇمىسىنىڭ سەرۆيستىك مودەلىنە كوشۋ جونىندەگى تاپسىرماسى اياسىندا، الماتى قالاسى اكىمدىگىنىڭ جوبالىق كەڭسەسىنىڭ قولداۋىمەن قالالىق پوليسيا دەپارتامەنتى جۇزەگە اسىرۋدا. ونىڭ باستى ماقساتى - قوعاممەن اشىق ديالوگ جانە تۇرعىنداردىڭ وتىنىشتەرىنە جەدەل جاۋاپ بەرۋ.
ءقازىردىڭ وزىندە قالانىڭ جەتى اۋدانىندا پوليسيانىڭ قىزمەت كورسەتۋ ورتالىقتارى اشىلدى. سەگىزىنشىسى بيىل قازان ايىندا تۇركسىب اۋدانىندا اشىلادى. عيمارات قالالىق بيۋدجەت ەسەبىنەن ساتىپ الىنىپ، دەپارتامەنت بالانسىنا بەرىلدى. وندا اكىمشىلىك، كوشى-قون، يۋۆەنالدىق پوليسيا، ۋچاسكەلىك ينسپەكتورلار ماسەلەلەرى بويىنشا مامانداردان كەڭەستەر الىپ، قىزمەت كورسەتۋگە قولايلى جاعداي جاسالعان.
«پوليسيانىڭ سەرۆيستىك مودەلى كليەنتكە باعىتتالعان ءتاسىلدى، قۇقىق قورعاۋ ورگاندارىنىڭ اشىقتىعى مەن ەسەپ بەرۋىن، ازاماتتاردىڭ پوليسيا قىزمەتىنە وڭاي قول جەتكىزۋىن بىلدىرەدى. سونىڭ ناتيجەسىندە حالىقتىڭ پوليسياعا دەگەن سەنىمى، ازاماتتارمەن اشىق ارىپتەستىك پەن قازاقستان حالقىنا قىزمەت ەتۋدەگى بەيتاراپتىق دەڭگەيى ارتادى دەپ كۇتەمىز»، - دەدى، الماتى قالالىق پد باستىعىنىڭ ءبىرىنشى ورىنباسارى، پوليسيا پولكوۆنيگى نۇرلان الماسبەكوۆ.
ەكى جارىم ايلىق جۇمىس بارىسىندا ورتالىق قىزمەتكەرلەرى قالا تۇرعىندارى مەن قوناقتارىنىڭ 8،5 مىڭ ءوتىنىشىن وڭدەدى.
پوليسيانىڭ قىزمەت كورسەتۋ ورتالىقتارى بارلىعى 55 قىزمەت ءتۇرىن كورسەتەدى. ول ءۇشىن بارلىق جاعداي جاسالعان – ينسپەكتورلار مەن پسيحولوگتار جەكە كابينەتتەردە قابىلداۋ جۇرگىزەدى. كوشى-قون پوليسياسىنىڭ قىزمەتكەرلەرى شەتەل ازاماتتارىن تىركەۋ نەمەسە قايتا تىركەۋ، قازاقستان رەسپۋبليكاسىنان تىسقارى جەرلەرگە كەتۋ نەمەسە كەلۋ كەزىندە ازاماتتىق الۋ جانە تۇراقتى تۇرۋ ءۇشىن قۇجاتتاردى رەسىمدەۋمەن اينالىسادى. كولىك يەلەرى جول-كولىك وقيعاسى دەرەكتەرى بويىنشا كەڭەس الا الادى، كولىك قۇرالدارىندا اكىمشىلىك ايىپپۇلدار، اۋىرتپالىقتار مەن شەكتەۋلەر بار-جوعىن تەكسەرىپ، كولىكتى قايتا جابدىقتاۋعا قۇجاتتاردى راسىمدەي الادى.
ورتالىقتاردا زاڭگەرلەر، مەدياتورلار، ىشكى ىستەر ورگاندارىنا وقۋعا جانە قىزمەتكە قابىلداۋ ءۇشىن كەڭەسشىلەر، سونداي-اق قارۋدى الىپ جۇرۋگە جانە ساقتاۋعا رۇقسات بەرەتىن قىزمەتكەرلەر جۇمىس ىستەيدى. سونداي-اق ازاماتتاردى قابىلداۋدى پروسەسسۋالدىق شەشىم قابىلداۋعا ۋاكىلەتتى قۇزىرەتتى قىزمەتكەرلەر – تەرگەۋشىلەر، جەدەل ۋاكىلدەر، ۋچاسكەلىك ينسپەكتورلار جۇرگىزەدى. بۇرىن بەرىلگەن ءوتىنىشتىڭ قارالۋ بارىسى تۋرالى بىلۋگە نەمەسە جاۋاپكەرشىلىككە تارتۋ سەبەپتەرى تۋرالى اقپارات الۋعا مۇمكىندىك بەرەتىن دەرەكقورلارعا قولجەتىمدىلىك قامتاماسىز ەتىلەدى.
ورتالىقتاردىڭ جۇمىس ۋاقىتى - 9:00-دەن 20:00-گە دەيىن. ساعات 23:00-گە دەيىن ۋچاسكەلىك پوليسيا ينسپەكتورلارىنىڭ ازاماتتاردى قابىلداۋىن ۇيىمداستىرۋعا بولادى. قالا اكىمىنىڭ تاپسىرماسى بويىنشا تۇرعىندارمەن تىكەلەي بايلانىستا بولاتىن بۇل قىزمەتتى دامىتۋعا ەرەكشە كوڭىل بولىنۋدە. الداعى ۋاقىتتا مۇراعاتتىق انىقتامالارعا اپوستيل قويۋ جانە باسقا دا قىزمەتتەر بويىنشا پوليسيانىڭ قىزمەت كورسەتۋ ورتالىقتارىنىڭ فۋنكسيونالدىعىن كەڭەيتۋ جوسپارلانۋدا.
پوليسيانىڭ قىزمەت كورسەتۋ ورتالىقتارىنىڭ مەكەنجايلارىن 2GIS قوسىمشاسىنان تابۋعا بولادى.
1. المالى اۋدانى، تولە بي كوش.، 273ا ءۇي، 1؛
2. اۋەزوۆ اۋدانى، جەتىسۋ-3 شاعىن اۋدانى، № 5ءۇي، 18؛
3. جەتىسۋ اۋدانى، اينابۇلاق شاعىن اۋدانى، 40ا ءۇي، 2 كورپۋس، 17؛
4. مەدەۋ اۋدانى، پوتانين كوش.، 14/17 ءۇي، 108؛
5. بوستاندىق اۋدانى، كوكتەم 3 شاعىن اۋدانى، № 24 ءۇي؛
6. الاتاۋ اۋدانى، اقبۇلاق شاعىن اۋدانى، سۋاتكول كوش.، 33/1 ءۇي، 2؛
7. ناۋرىزباي اۋدانى، شۇعىلا شاعىن اۋدانى، 347.
