بۇل تۋرالى “ بايتاق” جاسىلدار پارتياسىنىڭ الماتى قالاسىندا وتكەن V پارتيالىق كونفەرەنسياسىندا ايتىلدى.
“سەمەي يادرولىق پوليگونىن – الەمدەگى ەڭ ءقاۋىپتى سىناق ايماقتارىنىڭ ءبىرىن – جابۋعا باستاماشى بولىپ، بۇل ىسكە شەشۋشى ىقپال ەتكەن تۇلعا ءدال وسى ولجاس سۇلەيمەنوۆ ەدى. ونىڭ باستاماسى مەن قازاقستان جۇرگىزگەن حالىقارالىق قوزعالىستىڭ ناتيجەسىندە الەمنىڭ ءارتۇرلى ەلدەرىندەگى تاعى ءتورت ءىرى يادرولىق پوليگون، ونىڭ ىشىندە اقش-تاعى نيەۆادا پوليگونى جابىلدى.”- دەدى، «بايتاق» جاسىلدار پارتياسىنىڭ ءتوراعاسى
ازاماتحان اميرتايەۆ
سونداي- اق، شارا بارىسىندا الماتىدا اۋانىڭ لاستانۋىن ازايتۋعا باعىتتالعان تىڭ جوبا تانىستىرىلدى.
باستامانى «بايتاق» پارتياسىنىڭ الماتى فيليالىنا جاڭادان سايلانعان ءتورايىمى الما قاراش ۇسىندى. جوسپاردا جاڭا تەحنولوگيالىق شەشىمدەر، ناقتى مونيتورينگ دەرەكتەرى جانە الداعى 5 جىلعا ارنالعان قادامدار قامتىلعان.
جوبانىڭ نەگىزگى بولىگى – قالاعا 1500 اۋا تازارتقىش مۇنارا ورناتۋ.
ءار مۇنارانىڭ قۇنى شامامەن 100 مىڭ اقش دوللارى، ال ينۆەستورلار بۇل جوبانى ءبىر جىلدا تولىق قارجىلاندىرۋعا دايىن. مۇنداي شەشىم بەيجىڭ قالاسىنداعى سموگپەن كۇرەس تاجىريبەسىنە ۇقساس.
مامانداردىڭ ايتۋىنشا، بۇل ۇسىنىس الماتىداعى اۋا لاستانۋىن ءبىر جىلدا 70%-عا دەيىن تومەندەتۋگە مۇمكىندىك بەرەدى.
سونىمەن قاتار، ءدال بۇگىن «ۇلى دالانىڭ – جاسىل ەلشىسى» جوباسى دا ءوز مارەسىنە جەتتى. ۆەلوشاباندوز ساپار امانجول ۇلى بىرنەشە اي بويى ەلىمىزدى ءجۇرىپ ءوتىپ، 12 000 كم قاشىقتىقتى ەڭسەردى. جوبا بارىسىندا ەلدەگى ەكولوگيالىق پروبلەمالاردىڭ تولىق ءتىزىمىن جاساپ شىققان.
كونفەرەنسيادا “ ارال” جوباسىن قابىلداۋ تۋرالى دا ۇسىنىس ايتىلدى.
