2026 جىلى ەلىمىزدە بوكستان ستۋدەنتتەر اراسىندا الەم چەمپيوناتى ءدۇبىرلى دوداسى ءوتۋى ابدەن مۇمكىن. «الماتى قالاسىندا قۇرلىقارالىق بۇل دودانى وتكىزۋگە عيماراتتارىمىز دا جەتكىلىكتى، مۇمكىندىگىمىز دە بار!». بۇل تۋرالى بۇگىن قازاقستاننىڭ ۇلتتىق ستۋدەنتتىك سپورت وداعىنىڭ پرەزيدەنتى قايرات زاكيريانوۆ مالىمدەدى.
«دۇنيەجۇزىلىك ستۋدەنتتىك سپورت باسشىلىعىمەن كەزدەسۋ بارىسىندا ءبىز وڭىردەگى ستۋدەنتتىك سپورتتى دامىتۋ، ىنتىماقتاستىق ستراتەگياسى جانە ورتالىق ازيادا ستۋدەنتتىك سپورت جوبالارىن ىلگەرىلەتۋ باستامالارىن تالقىلادىق. مەن 2026 جىلى قازاقستاندا ستۋدەنتتەر اراسىنداعى بوكستان الەم چەمپيوناتىن وتكىزۋ تۋرالى ۇسىنىس جاسادىم جانە وعان قولداۋ ءبىلدىرىلدى. بۇل حالىقارالىق ستۋدەنتتىك سپورت فەدەراسياسىنىڭ جانە وزگە دە الەمدىك ۇيىمداردىڭ ەلىمىزگە دەگەن زور سەنىمىن كورسەتەدى»، – دەدى ول.
الماتىنىڭ 2026 جىلعى ستۋدەنتتەر اراسىنداعى بوكس الەم چەمپيوناتىن قابىلداۋى – تەك ءىرى سپورتتىق ءىس-شارا ەمەس، حالىقارالىق سەنىم مەن ەل ءيميدجىن نىعايتۋ جولىنداعى ۇلكەن قادام.
قايرات زاكيريانوۆ سونداي-اق WORLD Boxing ۇيىمىنىڭ بۇل باستاماعا رەسمي قولداۋ كورسەتەتىنىن اتاپ ءوتتى. بەلگىلى قازاقستاندىق سپورتشى گەنناديي گولوۆكين جاقىندا وسى ۇيىمنىڭ باسشىسى بولىپ تاعايىندالعان ەدى. بۇل چەمپيوناتتىڭ مارتەبەسىن ارتتىرىپ، جارىستىڭ حالىقارالىق دەڭگەيدەگى ىقپالىن كۇشەيتەدى دەپ كۇتىلۋدە. باسپا ءسوز ماسليحاتى بارىسىندا تاعى ءبىر ماڭىزدى ماسەلە قوزعالدى – 2029 جىلعى دۇنيەجۇزىلىك قىسقى ۋنيۆەرسيادانى ەكىنشى رەت قازاقستاندا وتكىزۋ مۇمكىندىگى. ەگەر 2029 جىلعى قىسقى ۋنيۆەرسيادا دا قازاقستانعا بەرىلسە، ەلىمىزدىڭ ستۋدەنتتىك سپورتتاعى ءرولى جاڭا دەڭگەيگە كوتەرىلۋى مۇمكىن.
«FISU بۇل تاقىرىپتى دا كوتەردى. بىزدە ۋنيۆەرسيادانى جوعارى دەڭگەيدە وتكىزۋ ءۇشىن بارلىق العىشارتتار بار»، – دەدى قايرات زاكيريانوۆ.
ول 2017 جىلعى قىسقى ۋنيۆەرسيادانىڭ ەل مەن الماتىنىڭ يميدجىنە زور اسەر ەتكەنىن، تاريحتاعى ەڭ ۇزدىك ستۋدەنتتىك ويىنداردىڭ ءبىرى رەتىندە تانىلعانىن ەسكە سالدى. سول تاجىريبە ءالى كۇنگە دەيىن قالانىڭ ءىرى جارىستار وتكىزۋگە قابىلەتتى سەنىمدى الاڭ رەتىندەگى بەدەلىن نىعايتىپ كەلەدى.
ستۋدەنتتىك سپورتتىڭ ىشكى دامۋى مەن ونىڭ پوزيسياسىن نىعايتۋ تۋرالى ايتا كەلە، قايرات زاكيريانوۆ «دەنە شىنىقتىرۋ جانە سپورت تۋرالى» قازاقستان رەسپۋبليكاسى زاڭىنا وزگەرىستەر ەنگىزۋ جوسپارلانىپ وتىرعانىن جەتكىزدى. اتاپ ايتقاندا، جوعارى وقۋ ورىندارى جانىنان سپورت كلۋبتارىن قۇرۋ جانە ولاردىڭ بازاسىندا ءارتۇرلى سپورت تۇرلەرى بويىنشا ستۋدەنتتىك ليگالار جۇيەسىن قالىپتاستىرۋ ۇسىنىلادى. بۇل جاستاردى سپورتقا كوبىرەك تارتۋعا، سونداي-اق الماتىدا جانە بۇكىل ەلدە بەلسەندى، سالاۋاتتى جانە باسەكەگە قابىلەتتى ستۋدەنتتىك ورتانى قالىپتاستىرۋعا ىقپال ەتپەك.
