الماتى وبلىسىنىڭ قاراساي اۋدانىندا رەسپۋبليكالىق ماڭىزى بار الماتى – بىشكەك اۆتوموبيل جولىنىڭ 19–27 شاقىرىم ارالىعىن قايتا جاڭعىرتۋ جانە كەڭەيتۋ جۇمىستارى باستالدى، - دەپ حابارلايدى alnews.
جوبا مەملەكەت باسشىسى قاسىم-جومارت توقايەۆتىڭ كولىك ينفراقۇرىلىمىن دامىتۋ جانە اۆتوموبيل جولدارىنىڭ وتكىزۋ قابىلەتىن ارتتىرۋ جونىندەگى تاپسىرماسىن ورىنداۋ اياسىندا جۇزەگە اسىرىلۋدا.
ءىس-شاراعا الماتى قالاسى اكىمىنىڭ ءبىرىنشى ورىنباسارى الماسحان سماتلايەۆ، الماتى وبلىسى اكىمدىگىنىڭ، «قازاۆتوجول» ۇك» اق، قاراساي اۋدانى اكىمدىگىنىڭ، مەردىگەر ۇيىمداردىڭ جانە بۇقارالىق اقپارات قۇرالدارىنىڭ وكىلدەرى قاتىستى. جوبانىڭ تەحنيكالىق پارامەترلەرىمەن تانىسقاننان كەيىن قۇرىلىس تەحنيكاسى جەر جۇمىستارىنا كىرىستى.
قايتا جاڭعىرتىلاتىن جول ۋچاسكەسى رەسپۋبليكالىق جول جەلىسىندەگى ەڭ قارقىندى قوزعالىس جۇرەتىن باعىتتاردىڭ ءبىرى سانالادى. بۇل جولمەن تاۋلىگىنە 70 مىڭنان استام اۆتوكولىك قاتىنايدى. قازىرگى ءتورت جولاقتى جولدىڭ وتكىزۋ قابىلەتى جەتكىلىكسىز بولعاندىقتان، كولىك كەپتەلىسى ءجيى تۋىنداپ، قوزعالىس جىلدامدىعى تومەندەيدى جانە الماتى قالاسى مەن قالا ماڭىنداعى ەلدى مەكەندەر اراسىنداعى كولىك بايلانىسىنا كەرى اسەرىن تيگىزۋدە.
«الماتى – بىشكەك اۆتوجولى تەك قالا ءۇشىن عانا ەمەس، بۇكىل الماتى اگلومەراسياسى ءۇشىن ستراتەگيالىق ماڭىزى بار باعىت. جولدى كەڭەيتۋ ونىڭ وتكىزۋ قابىلەتىن ارتتىرىپ، جول ءجۇرۋ ۋاقىتىن قىسقارتادى، سونداي-اق جۇرگىزۋشىلەر مەن جولاۋشىلار ءۇشىن ءقاۋىپسىز ءارى جايلى جاعداي قالىپتاستىرادى»، – دەدى الماسحان سماتلايەۆ.
جوبا اياسىندا جولدىڭ ءجۇرىس بولىگى ءتورت جولاقتان سەگىز جولاققا دەيىن كەڭەيتىلەدى. سونىمەن قاتار، «تاعا» ۇلگىسىندەگى ەكى جولايرىق، توعىز جەرۇستى جۇرگىنشىلەر وتكەلى سالىنىپ، جول بويىنا تروتۋارلار مەن زاماناۋي سىرتقى جارىقتاندىرۋ جۇيەسى ورناتىلادى. بۇدان بولەك، گاز قۇبىرلارى، سۋمەن جابدىقتاۋ، ەلەكترمەن جابدىقتاۋ جانە بايلانىس جەلىلەرى قايتا جاڭارتىلىپ، جولعا جاڭا كۇردەلى ۇلگىدەگى جابىن توسەلەدى. جوبا 2026 جىلدىڭ ءساۋىر ايىندا مەملەكەتتىك ساراپتامانىڭ وڭ قورىتىندىسىن الدى.
«بۇل جول ۋچاسكەسىن جاڭعىرتۋ – الماتىنىڭ كولىك جۇيەسىن كەشەندى دامىتۋ جۇمىستارىنىڭ ءبىر بولىگى. قازىرگى ۋاقىتتا قالادا ۇلكەن الماتى اينالما اۆتوموبيل جولىنا دەيىن سوزىلاتىن التى راديالدى جول مەن جەتى ماگيسترالدىق كوشەنى سالۋ جانە ۇزارتۋ جۇمىستارى جالعاسۋدا. سونىمەن قاتار مەترو، LRT جانە SkyTrain جۇيەلەرى قاتار دامىتىلىپ جاتىر»، – دەدى الماسحان سماتلايەۆ.
جوبانى ىسكە اسىرۋ ناتيجەسىندە الماتى قالاسىنا كىرەبەرىس جانە شىعابەرىس باعىتتارداعى كولىك جۇكتەمەسىن ازايتۋ، جول قوزعالىسى قاۋىپسىزدىگىن ارتتىرۋ جانە قالا مەن قالا ماڭىنداعى ەلدى مەكەندەر اراسىنداعى كولىك قاتىناسىن جاقسارتۋ كوزدەلىپ وتىر. سونىمەن قاتار جوبا قازاقستان مەن قىرعىزستاندى بايلانىستىراتىن حالىقارالىق كولىك ءدالىزىن دامىتۋعا، ساۋدا-ەكونوميكالىق بايلانىستاردى نىعايتۋعا جانە ەلىمىزدىڭ ترانزيتتىك الەۋەتىن ارتتىرۋعا ىقپال ەتەدى.
