الماتىنىڭ اۋەزوۆ اۋدانىندا قالا اكىمىنىڭ اتموسفەرالىق اۋانىڭ ساپاسىن جاقسارتۋ جونىندەگى تاپسىرماسى اياسىنداعى جۇمىستار جالعاسىپ كەلەدى. بۇل تۋرالى اۋدان اكىمدىگىنىڭ وكىلدەرى ايتتى.
ەكولوگيا جانە قورشاعان ورتا باسقارماسىمەن، سونداي-اق توتەنشە جاعدايلار دەپارتامەنتىمەن بىرلەسىپ كاسىپكەرلىك نىساندارىنا تەكسەرۋ جۇرگىزىلدى.
مونيتورينگ قورىتىندىسى بويىنشا 79 قوعامدىق تاماقتانۋ ورنىنىڭ 39-ىندا گيدروفيلترلەر ورناتىلعانى انىقتالدى. 8 مونشا كەشەنىنىڭ 7-ەۋى گازبەن جىلىتۋ جۇيەسىنە كوشكەن. ال 22 تەحنيكالىق قىزمەت كورسەتۋ ستانسياسىنىڭ 17ء-سى گازبەن جىلىتىلادى.
قاتتى جانە سۇيىق وتىندى پايدالاناتىن نىسانداردىڭ باسشىلارىمەن گازعا نەمەسە ەلەكترمەن جىلىتۋ جۇيەسىنە كوشۋ، سونداي-اق الماتى قالاسىنىڭ كورىكتەندىرۋ قاعيدالارى مەن اتموسفەرالىق اۋانى قورعاۋ قاعيدالارىن ساقتاۋ ماسەلەلەرى بويىنشا ءتۇسىندىرۋ جۇمىستارى جۇرگىزىلدى.
