قاسىم-جومارت توقايەۆ «قازمەديا» ورتالىعىندا رەسپۋبليكالىق رەفەرەندۋم اياسىنداعى ۇگىت-ناسيحات ناۋقانىنا بەلسەندى قاتىسقان جاستارمەن كەزدەستى، - دەپ حابارلايدى اقوردا.
پرەزيدەنت بۇگىن تاريحي كۇن ەكەنىن اتاپ ءوتىپ، جاستارعا ريزاشىلىعىن ءبىلدىردى.
– شىن مانىندە، بۇل كۇن ەل ومىرىندە ماڭگى ساقتالادى. ەندى 15 ناۋرىز – كونستيتۋسيا كۇنى بولىپ بەلگىلەنەدى. بۇل – ەلىمىزدىڭ باستى قۇجاتى. مەن باسقا دا مەملەكەتتەردىڭ كونستيتۋسيالارىمەن تانىسىپ شىقتىم. ءبىزدىڭ كونستيتۋسيامىز ەڭ ۇزدىك اتا زاڭداردىڭ قاتارىندا تۇرادى دەپ سەنىممەن ايتا الامىن، – دەدى مەملەكەت باسشىسى.
سونىمەن قاتار پرەزيدەنت جاڭا كونستيتۋسيا، ەڭ الدىمەن، جاستارعا ارنالعانىنا نازار اۋداردى. اتا زاڭعا ۆولونتەرلىك قىزمەت، عىلىم، يننوۆاسيا، جاساندى ينتەللەكت سياقتى ۇعىمدار ەنگىزىلگەنىنە توقتالدى.
– اۋقىمدى ۇگىت-ناسيحات ناۋقانى جۇرگىزىلدى. الدىمىزدا جۇمىس كوپ. ەندى جازدا پارلامەنت سايلاۋى وتەدى. ونى ءبىر ەل بولىپ اتقارۋىمىز كەرەك. بۇل جاستاردىڭ پارلامەنتى بولۋى قاجەت دەپ ويلايمىن، – دەدى قاسىم-جومارت توقايەۆ.
كەزدەسۋدە «جاستار رۋحى» جاستار قاناتىنىڭ ءتوراعاسى اقەركە ەسكەندىروۆا، كرەاتيۆتى يندۋستريا وكىلى، كاسىپكەر كاميل بايراموۆ، بەلسەندى جاستار ەرجان حاميتوۆ پەن نۇربول سەرىكباي ءسوز سويلەدى.
جاستار ءبىر اي ىشىندە ءتۇرلى فورماتتا 5 مىڭعا جۋىق كەزدەسۋ وتكىزىپ، وعان 1،5 ميلليوننان اسا ازامات قاتىسقانىن جەتكىزدى. سونداي-اق ەلىمىزدە قولعا الىنعان وزگەرىستەردىڭ بارلىعىن قولدايتىنىن ايتتى.
