پرەزيدەنت قاسىم-جومارت توقايەۆ دۇنيەجۇزىلىك جاساندى ينتەللەكت كونفەرەنسياسىنىڭ اشىلۋ راسىمىنە قاتىستى، - دەپ حابارلايدى alnews.
شانحايدا ءوتىپ جاتقان ءداستۇرلى جيىن بيىل «جارقىن بولاشاق ءۇشىن جاساندى ينتەللەكت سالاسىنداعى سەرىكتەستىك» تاقىرىبىنا ارنالىپ وتىر.
مەملەكەت باسشىسى بۇل كونفەرەنسيا قىتايدىڭ جاساندى ينتەللەكت سالاسىنداعى ايتۋلى جەتىستىكتەرىن ايقىن كورسەتەتىنىن اتاپ ءوتتى.
– بۇگىندە دۇنيە جۇزىندەگى جاساندى ينتەللەكتىنى زەرتتەۋشىلەردىڭ جارتىسىنان استامى – جۇڭگو ەلىنىڭ وكىلدەرى. جي سالاسىنداعى پاتەنتتەردىڭ باسىم بولىگى قىتايلىق جاڭاشىل ماماندارعا تيەسىلى. ال ەلدىڭ قارقىندى يننوۆاسيالىق ەكوجۇيەسى وزىق تەحنولوگيالاردىڭ كوپتەگەن باعىتىندا سونى سەرپىلىس جاساۋدا، – دەدى پرەزيدەنت.
مەملەكەت باسشىسى دۇنيەجۇزىلىك جاساندى ينتەللەكت كونفەرەنسياسىندا جاريالانعان «بارشا ادامزات يگىلىگىنە قىزمەت ەتەتىن جي» تۇجىرىمداماسىنا قولداۋ ءبىلدىردى.
– تەحنولوگيالىق پروگرەستى بارشانىڭ يگىلىگىنە اينالدىرۋعا كۇش-جىگەر جۇمىلدىرعاندا وسى ۇسىنىلعان قاعيداتتاردى باسشىلىققا العان ءجون دەپ سانايمىن. كەلەشەكتىڭ كەلبەتىن ءوزارا سەنىم مەن ورتاق مۇددەگە ساي تىعىز ىنتىماقتاستىق ورناتىپ، سەرىكتەسە ارەكەت ەتەتىندەر ايقىندايدى. مەن بۇعان كامىل سەنەمىن. وسى ورايدا ءتوراعا سي سزينپين ۇسىنعان «ادامزاتتىڭ ورتاق تاعدىرى قوعامداستىعىن» قۇرۋ تۋرالى تۇجىرىمدامانىڭ ماڭىزى زور. قازاقستان الىستى بولجاعان بۇل باستامانى جوعارى باعالايدى ءارى جاساندى ينتەللەكت داۋىرىندە ونىڭ وزەكتىلىگى ارتىپ كەلەدى دەپ سانايدى، – دەدى قاسىم-جومارت توقايەۆ.
