كونستيتۋسيالىق كوميسسيا ەكىنشى وتىرىسىندا «قۇرىلتاي»، «حالىق كەڭەسى» بولىمدەرى بويىنشا نورمالاردى تالقىلادى، - دەپ حابارلايدى alnews.
پارلامەنت سەناتىنىڭ دەپۋاتى، نۇرلان بەكنازاروۆ كونستيتۋسيالىق كوميسسيا وتىرىسىندا «قۇرىلتاي»، «حالىق كەڭەسى» بولىمدەرىندەگى نورمالارعا توقتالدى.
كوميسسيا مۇشەسىنىڭ ايتۋىنشا، ءبىر پالاتالى پارلامەنتكە وتۋگە بايلانىستى قولدانىستاعى كونستيتۋسيانىڭ «پارلامەنت» ءبولىمىنىڭ ءبىرقاتار باپتارىنا ونىڭ قۇرىلۋى، سايلانۋى، قۇزىرەتى، وكىلەتتىگى، زاڭ قابىلداۋ پروسەستەرى مەن قۇرامىنا قاتىستى ماڭىزدى وزگەرىستەر ەنگىزۋ كوزدەلگەن. ءبىرقاتار باپتاردىڭ كۇشى تۇتاستاي الىنىپ تاستالادى.
«جوباعا سايكەس، قازاقستان رەسپۋبليكاسىنىڭ قۇرىلتايى – قازاقستان رەسپۋبليكاسىنىڭ زاڭ شىعارۋ بيلىگiن جۇزەگە اسىراتىن ەڭ جوعارى وكiلدi ورگانى بولىپ سانالادى. قۇرىلتايدىڭ وكىلەتتىگى ونىڭ ءبىرىنشى سەسسياسى اشىلعان كەزدەن باستالادى جانە جاڭادان سايلانعان قۇرىلتايدىڭ ءبىرىنشى سەسسياسىنىڭ جۇمىسى باستالعان كەزدە اياقتالادى. قۇرىلتايدىڭ ۇيىمداستىرىلۋى مەن قىزمەتى، ونىڭ دەپۋتاتتارىنىڭ قۇقىقتىق جاعدايى كونستيتۋسيالىق زاڭدا ايقىندالادى»، – دەدى نۇرلان بەكنازاروۆ.
قۇرىلتاي كونستيتۋسيالىق زاڭدا بەلگىلەنگەن تارتىپپەن ءبىرتۇتاس جالپىۇلتتىق سايلاۋ وكرۋگىنىڭ اۋماعى بويىنشا پروپورسيونالدى وكىلدىك ەتۋ جۇيەسىمەن سايلاناتىن 145 دەپۋتاتتان جاساقتالادى. دەپۋتاتتاردىڭ وكىلەتتىك مەرزىمىن بەس جىل ەتىپ بەلگىلەۋ ۇسىنىلعان.
سونىمەن بىرگە، كوميسسيا وتىرىسىندا قۇرىلتاي دەپۋتاتتارىن سايلاۋ مەرزىمدەرى مەن داۋىس بەرۋ ءتارتىبى، قۇرىلتاي ءتوراعاسىن سايلاۋ، ۇمىتكەرلەرگە قويىلاتىن تالاپتار مەن تىيىمدار تالقىلاندى.
سونداي-اق، پرەزيدەنت جاڭا رەفورمالار اياسىندا قوعامىمىزدىڭ ەلەۋلى دامۋىنا، ەلدىڭ ىنتىماق-بىرلىگىن نىعايتۋعا ىقپال ەتەتىن قوعامدىق-ساياسي بىرلەستىكتەر مەن بەلسەندىلەردى بىرىكتىرەتىن جاڭا جوعارى كونسۋلتاتيۆتىك ورگان – قازاقستان حالىق كەڭەسىن قۇرۋدى ۇسىنعان ەدى. دەپۋتات اتا زاڭعا حالىق كەڭەسىنىڭ وكىلدىگىنە، قۇزىرەتىنە، قاتىستى جەكە ءبولىمنىڭ ەنگىزىلۋى كونسۋلتاتيۆتىك ورگاننىڭ ماڭىزدىلىعىن ايقىندايتىنىن جەتكىزدى.
«قازاقستان رەسپۋبليكاسىنىڭ حالىق كەڭەسى – قازاقستان حالقىنىڭ مۇددەسىن بىلدىرەتىن جوعارى كونسۋلتاتيۆتىك ورگان بولىپ بەلگىلەنەدى جانە ونىڭ قۇرامى قازاقستان رەسپۋبليكاسىنىڭ ازاماتتارىنان جاساقتالادى. حالىق كەڭەسىن قۇرۋ ءتارتىبى جانە ونىڭ قۇرامى، وكىلەتتىگى مەن قىزمەتىن ۇيىمداستىرۋ ماسەلەلەرىن ايقىندايتىن زاڭعا كونستيتۋسيالىق مارتەبە بەرىلگەنىن ەرەكشە اتاپ ءوتۋ قاجەت»، – دەدى نۇرلان بەكنازاروۆ.
