الماتى قالاسى جاستار ساياساتى باسقارماسى قولداۋىمەن، «Human Resources Kazkhstan» جەكە مەكەمەسىنىڭ ۇيىمداستىرۋىمەن جەتىسۋ اۋدانىنىڭ دەمالىس ورتالىقتارى تاربيەلەنۋشىلەرى شارىن شاتقالىنا تانىمدىق ساپارعا باردى
19 شىلدە كۇنى الماتى قالاسى جاستار ساياساتى باسقارماسىنىڭ قولداۋىمەن جەتىسۋ اۋدانىنىڭ دەمالىس ورتالىقتارىندا تاربيەلەنىپ جاتقان بالالارعا ارنالعان شارىن شاتقالىنا تانىمدىق باعىتتاعى ەكسكۋرسيا ۇيىمداستىرىلدى.
شارا اياسىندا 50 بالا مەن ولاردىڭ جەتەكشىلەرى ەلىمىزدىڭ تابيعي جاۋھارلارىنىڭ ءبىرى — شارىن شاتقالىنا بارىپ، ونىڭ عاجايىپ لاندشافتىمەن، تاريحي ەرەكشەلىكتەرىمەن جانە گەوگرافياسىمەن جاقىنىراق تانىستى. تابيعات اياسىنداعى جاياۋ سەرۋەن بالالار ءۇشىن ەرەكشە اسەرگە تولى بولدى: ولار جاڭا مالىمەتتەر ءبىلىپ، تابيعاتپەن ەتەنە ارالاسىپ، قورشاعان ورتانىڭ سۇلۋلىعىن سەزىندى.
ساپاردىڭ نەگىزگى ماقساتى — بالالاردىڭ ەكولوگيالىق مادەنيەتىن قالىپتاستىرۋ، تۋعان ولكەنى سۇيۋگە باۋلۋ جانە پاتريوتتىق تاربيە بەرۋ. سونىمەن قاتار، جازعى دەمالىس ۋاقىتىن مازمۇندى، بەلسەندى ءارى ەستە قالارلىقتاي وتكىزۋگە جاعداي جاساۋ.
بۇل — جەتىسۋ اۋدانى دەمالىس ورتالىقتارىنىڭ جازعى باعدارلامالار لەگىندەگى كەزەكتى تابيعاتقا سەرۋەنى. بۇعان دەيىن بالالار ءۇشىن كولساي كولىنە دە وسىنداي قىزىقتى ساياحات ۇيىمداستىرىلعان بولاتىن.
