«ALMATY CIRCUS FESTIVAL»: 16 ەل، 55 جىلدىق ءداستۇر جانە قازاق مەملەكەتتىك سيرك ارەناسىنداعى بىرەگەي ونەر كورسەتىلىمدەرى
الماتى تاعى ءبىر مارتە سيرك ونەرىنىڭ حالىقارالىق استاناسىنا اينالادى. قالادا 2025 جىلعى 23-27 شىلدە ارالىعىندا الماتى قالاسى اكىمدىگىنىڭ قولداۋىمەن III حالىقارالىق ALMATY CIRCUS FESTIVAL فەستيۆالى وتەدى.
اۋقىمدى شارا قازاق مەملەكەتتىك سيركىنىڭ 55 جىلدىق مەرەيتويىنا ارنالادى – بۇل مەكەمە قالا مادەنيەتىنىڭ نىشانىنا اينالعان، ءوز ءداستۇرى مەن ايگىلى ارتىستەرىمەن تانىمال.
قىسقا ۋاقىت ىشىندە ALMATY CIRCUS FESTIVAL الەمدىك ۇزدىك ون سيرك فەستيۆالىنىڭ قاتارىنا ەندى. ونى بەدەلدى باسەكەلەستىك دەڭگەيى، حالىقارالىق قاتىسۋشىلار قۇرامى جانە شەبەرلىك، شابىت پەن مادەني ارتۇرلىلىك ۇيلەسكەن وزگەشە اتموسفەراسى ەرەكشەلەيدى. بيىلعى جىلى ۇيىمداستىرۋ كوميتەتىنە 20 ەلدەن 180-نەن استام ءوتىنىم كەلىپ ءتۇستى. اقتىق كەزەڭگە 16 مەملەكەتتەن ۇزدىك نومىرلەر ىرىكتەلىپ الىندى.
«وسىنداي فەستيۆالدىڭ وتكىزىلۋى الماتىنىڭ ورتالىق ازياداعى مادەني حاب رەتىندەگى بەدەلىن نىعايتادى. بۇل – حالىقارالىق ىنتىماقتاستىققا، جاستاردى دامىتۋعا جانە داستۇرلەرىمىزدى ساقتاۋعا قوسىلعان ۇلەس. الماتى الەمنىڭ ۇزدىك سيرك ارتىستەرىن ءبىر ارەنادا بىرىكتىرەدى»، – دەپ اتاپ ءوتتى قازاق مەملەكەتتىك سيركىنىڭ ديرەكتورى ماقسات جايىقوۆ.
باعدارلاما اۋە اكروباتيكاسىنان باستاپ تەاترلانعان سايقىمازاقتارعا دەيىن سيرك ونەرىنىڭ بارلىق جانرىن قامتيدى. فرانسيا، بەلگيا، ارگەنتينا، جۇڭگو، ۆەتنام، موڭعوليا، رەسەي، ۋكراينا، بەلارۋس، وزبەكستان، قىرعىزستان، يزرايل جانە ەفيوپيادان كەلگەن ارتىستەر الماتىعا وزدەرىنىڭ ۇزدىك قويىلىمدارىن الىپ كەلەدى. قازاقستان اتىنان «Hassak» ترۋپپاسى ونەر كورسەتەدى، ولار سيركتىڭ مەرەيتويىنا ارنايى دايىندالعان ەرەكشە تريۋكتى، ياعني ايگىلى ابىشيەۆتەر اۋلەتىنە قۇرمەت رەتىندە ۇشتىك اكروباتيكالىق يىققا كوتەرۋ تريۋگىن العاش رەت ورىندايدى. بۇل ءنومىر ۇرپاقتار ساباقتاستىعىنىڭ سيمۆولى بولماق.
بۇعان دەيىن حالىقارالىق كونكۋرستاردا كورسەتىلمەگەن ونەر كورسەتىلىمدەرىنە ەرەكشە نازار اۋدارىلعان. سولاردىڭ قاتارىندا – ۋكراينادان كەلگەن دۋەتتىڭ «جان سىرى» اتتى اۋە دراماسى، سونداي-اق الەمگە تانىمال، الەمدەگى ۇزدىك بەس سايقىمازاقتىڭ ءبىرى سانالاتىن گەرمانيالىق حۋش-ما-حۋشتىڭ فيلوسوفيالىق سايقىمازاعى بار. ونىڭ ساحنالىق ءتىلى – يۋمور مەن ابسۋرد تەاترىنىڭ ۇيلەسىمى. بۇل قويىلىمدار سيرك ونەرىنىڭ كورەرمەندەرى ءۇشىن ناعىز جاڭالىق بولماق.
قازىلار القاسىنىڭ قۇرامى دا ەرەكشە: وعان تەك شەتەلدىك ونەر قايراتكەرلەرى عانا ەمەس، سونىمەن قاتار وتاندىق سيرك ارداگەرلەرى دە كىرەدى.
«سيرك فەستيۆالى – بۇل جاي عانا بايقاۋ ەمەس. بۇل – شىعارماشىلىق زەرتحانا، مادەني سۇحبات جانە ۇرپاقتار اراسىنداعى كوپىر. ءبىز كورەرمەندەرگە تانىمال شەبەرلەردى عانا ەمەس، ەش جەردە كورسەتىلمەگەن نومىرلەردى ۇسىنۋىمىزبەن دە ەرەكشە ماقتانامىز»، – دەدى فەستيۆالدىڭ باس رەجيسسەرى مارينا رەدكو.
ايتا كەتەيىك، الماتى تۇرعىندارى مەن قالا قوناقتارى 23-27 شىلدە ارالىعىندا كۇن سايىن ساعات 18:00-دە وتەتىن كاسىبي شەبەرلىككە، باتىلدىققا جانە رەكوردتىق تريۋكتەرگە تولى ۇمىتىلماس شوۋدى تاماشالاي الادى. «ALMATY CIRCUS FESTIVAL» جەڭىمپازدارى مەن فيناليستەرىنىڭ قاتىسۋىمەن وتەتىن فەستيۆالدىك باعدارلاما 2025 جىلدىڭ 24 تامىزىنا دەيىن جالعاسادى.
