يزرايل حەزبوللا كۇشتەرىنە قارسى جاڭا سوعىس مايدانىن اشۋى مۇمكىن. بۇل تۋرالى ءبىر كۇن بۇرىن ەلدىڭ پرەمەر-مينيسترى بەنيامين نەتانياحۋ مالىمدەدى. ول يزرايلدىك تەلەارناعا جاساعان مالىمدەمەسىندە گازاداعى سوعىس ەندى بۇرىنعىداي قارقىندى بولمايتىنىن ايتقان. سەبەبى، اسكەرلەردى سولتۇستىككە ليۆانمەن شەكاراعا قاراي جونەلتۋدى ويلاستىرۋدا.
"حاماسپەن سوعىستىڭ قارقىندى كەزەڭى اياقتالۋدا، بۇل سوعىس اياقتالدى دەگەندى بىلدىرمەيدى. گازادا اتىستى توقتاتۋ كەلىسىمى ءالى بولا قويمايدى. كەلەسى شايقاس ليۆاندا حاماستىڭ وداقتاسى حەزبوللا كۇشتەرىنە قارسى بولۋى مۇمكىن" – دەگەن يزرايل پرەمەر-مينيسترى.
نەتانياحۋ قايتالاي بيلىككە كەلگەننەن كەيىن ول اشىنعان وڭشىل توپتارمەن كواليسيا تۇزگەنى ءمالىم. ول ءوزىنىڭ بيلىك ىشىندەگى ىقپالىن ساقتاپ قالۋ ءۇشىن دە گازاداعى حاماستى تۇبىمەن قۇرتامىن دەگەن ۋادەسىنەن باس تارتپاسى انىق. ال حاماستى قولداعان حەزبولللا كۇشتەرى ءيزرايلدىڭ سولتۇستىك وڭىرلەرىن تىمباي بومبالاپ كەلەدى. ەكى تاراپ اراسىندا تىكەلەي قارۋلى جاۋاپتاسۋلار دا بولدى.
وتكەن اپتادا يزرايل كۇشتەرى ليۆان جەرىنە پارمەندى سوققىلارىن جاسادى. وسىدان كەيىن حەزبوللا جەتەكشىسى يزاريلگە قاراتا قاتاڭ مالىمدەمەسىن جاساعان.
ول سوزىندە: "ءبىز سوعىسۋدان قورىقپايمىز، ەگەر يزرايل بىزگە شابۋىل جاسايتىن بولسا بۇل ەشقانداي ىمىراسىز جانە ءتۇپسىز سوعىس بولادى. ءبىزدىڭ بۇعان ءالىمىز جەتەدى"، – دەگەن.
يزرايل الداعى ۋاقىتتا گازادا ارميانىڭ از بولىگىن قالدىرىپ، نەگىزگى كۇشتى ليۆانعا باعىتتاۋعا دايىندالىپ جاتقانىن مالىمدەدى. بۇل گازاداعى سوعىستىڭ ايماققا تارالۋى مۇمكىن دەگەن بىلتىردان بەرگى ايتىلىپ كەلە جاتقان ءقاۋىپتى راستاعانداي بولدى.
