1 قازان كۇنى كەشتە يران ءيزرايلدى بالليستيكالىق زمىراندارمەن سوققىلادى. شابۋىلدان بىرنەشە ساعات بۇرىن اقش تەگەراننىڭ زىمىران شابۋىلىنا دايىندالىپ جاتقانى تۋرالى مالىمدەگەن ەدى.
يران ءوزىنىڭ ايماقتاعى مۇددەسىنە ءتونىپ جاتقان قاۋىپتەرگە قاراماستان ۇزاق ۋاقىت ءۇنسىز جاتقان بولاتىن. يزرايل ليۆانداعى "حەزبوللاعا" قارسى قۇرلىقتاعى اسكەري وپەراسياسىن باستاعاننان كەيىن تەگەراننىڭ شىدامى تاۋسىلعانعا ۇقسادى. سەيسەنبىنىڭ كەشىندە يراننىڭ بالليستيكالىق زىمىراندارى ءيزرايلدى بەتكە الىپ جاڭبىرشا جاۋدى. شابۋىلدىڭ سۇراپىل بولعانى سونشالىق، جەرگىلىكتى اقپارات قۇرالدارى اۋە شابۋىلىن ەسكەرتكەن دابىل ءۇنى ءيزرايلدىڭ بارلىق جەرىنەن جاڭعىرعانىن ايتىپ جاتتى.
شابۋىل ناتيجەسى
پەنتاگوننىڭ مالىمدەۋىنشە، يراننىڭ كەزەكتى اۋە شابۋىلى ونىڭ ساۋىردەگى شابۋىلانان الدە قايدا جويقىن بولعان. يزرايل بولسا بولجاممەن 180 زىمىران اتىلدى دەپ مالىمدەدى. ال اقش پرەزيدەنتى جو بايدەن رەسمي مالىمدەمەسىندە زىمىراندار سانى 200 دەپ كورسەتىلدى. شابۋىل ناتيجەسىندە ءيزرايلدىڭ ءبىرقاتار جەرىندە جارىلىستار بولدى. دەگەنمەن، ەلدىڭ اۋە قورعانىس جۇيەسى زىمىرانداردىڭ كوبىن اۋەدە اتىپ قۇلاتقان. كەيبىر زىمىراندار تەل-اۆيۆكە دە ءتۇسىپ جارىلعانى تۋرالى الەۋمەتتىك جەلىلەردە كەسكىندەر كوپتەپ تارادى.
يران مالىمدەمەسى
شابۋىلدان كەيىن يراننىڭ ريەۆوليۋسيا ساقشىلارى كورپۋسى رەسمي حابار تاراتتى. ولار بۇل اركەتتى حاماس جەتەكشىسى يسمايل حانيانىڭ، "حەزبوللا" باسشىسى حاسان ناسراللانىڭ كوز جۇمۋىنا، سونداي-اق، گازا مەن ليۆانداعى قازا بولعان بەيبىت تۇرعىندار ءۇشىن جاۋاپ ەكەنىن ايتقان. رەسمي مالىمدەمەدە ءيزرايلدىڭ ماڭىزدى اسكەري بازالارى نىساناعا الىنعانى ايتىلعان.
يير رەسميلەرى تولىققاندى سوعىستى قالامايتىندارىن ايتتى. بۇنداي ارەكەتتەر ەلدىڭ ۇلتتىق مۇددەسىن قورعاۋ ءۇشىن جاسالىپ جاتقانىن مالىمدەگەن.
اقش پوزيسياسى
ۆاشينگتون تەگەراندى اۋىر سىننىڭ استىنا الۋدا. پرەزيدەنت بايدان يراننىڭ شابۋىلىن بىردەن ايىپتادى ءارى اقش اسكەري كۇشتەرىنە ءيزرايلدىڭ قورعانۋىنا كومەكتەسۋگە بۇيرىق بەرگەن. اۋە شابۋىلدارىنان قورعانۋعا ايماققا جاقىن سۋلارداعى امەريكالىق اسكەري كەمەلەردىڭ اۋە قورعانىس جۇيەلەرى دە اتسالىستى دەگەن مالىمەت بار.
يزرايل پوزيسياسى
يزرايل ءقازىردىڭ وزىندە يرانعا قارسى جاۋاپ بەرۋگە دايىندالىپ جاتىر. ساحال-دىڭ رەسمي وكىلى دانيەل حاگاري "يران بۇل ارەكەتىنىڭ كەسەپەتىن تارتادى" دەگەن مالىمدەمەسىن جاسادى.
ەۆرەي مەملەكەتىنىڭ پرەمەر-مينيسترى مالىمدەمە جاساپ، "يران ۇلكەن قاتەلىككە ۇرىنعانىن" ايتتى. بەنيامين نەتانياحۋ:"يران بۇگىن تۇندە ۇلكەن قاتەلىك جاسادى. ول ءۇشىن جاۋاپكەرشىلىكتى ءوز موينىنا الادى. يران رەجيمى ءبىزدىڭ ءوزىمىزدى قورعاۋعا جانە دۇشپاننان كەك الۋعا بەل بايلاۋىمىزدى تۇسىنبەيدى. بىزگە كىم شابۋىل جاساسا، سوعان شابۋىل جاسايمىز"، – دەگەن. دەدى.
ايماقتىق اۋقىمدى سوعىس قاتەرى
قوس تاراپتا بۇعان دەيىن بەتپە-بەت سوعىستى، تولىق باسىشتاپبتى قاقتىعىستى قالامايتىندارىن ايتىپ كەلگەن. الايدا، يزرايل تەز ارادا قارۋلى جاۋاپ بەرەرىن ەسكەرتىپ جاتقاندا يران دا وعان قارىمتا جاۋاپ بەرىپ، يزرايل ارتىق ارەكەتكە بارسا، بۇدان دا جويقىن سوققىلار بولاتىنىن ايتقان. بۇل الەم ەلدەرىنىڭ ەنەرگەتيكاسىنداعى اسەرى مول ايماقتا جاڭا ايماقتىق سوعىستىڭ ءقاۋىپىن كۇشەيتكەن وقيعا بولدى. تاراپتار سوعىستى قالامايتىندارىن ايتسا دا، ەرەكەستىڭ سوڭىنان توبەلەس شىقپايتىنىنا كەپىلدىك جوق. ونىڭ ۇستىنە ەلدەگى سايلاۋ ناۋقانىنا بايلانىستى اقش پوزيسياسى انىق بولماي تۇرعان تۇستا ايماقتاعى مۇنداي ءقاۋىپتى ۇردىستەر تىپتەن تەز قارقىنمەن دامۋى مۇمكىن.
The Alnews
