كونستيتۋسيالىق رەفورما جونىندەگى كوميسسيانىڭ 12ء-شى وتىرىسى بارىسىندا قازاقستان رەسپۋبليكاسى كونستيتۋسيالىق سوتى ءتوراعاسىنىڭ ورىنباسارى باقىت نۇرمۇحانوۆ كەلىپ تۇسكەن ۇسىنىستاردىڭ قورىتىندىلارى نەگىزىندە جاڭا اتا زاڭ جوباسىنا ەنگىزىلگەن قوسىمشا نورمالار تۋرالى حابارلادى.
ونىڭ ايتۋىنشا، نەگىزگى باعىتتاردىڭ ءبىرى – تۇرعىن ۇيگە قول سۇعىلماۋشىلىق كەپىلدىگىن كۇشەيتۋ. باقىت نۇرمۇحانوۆ 28-باپتىڭ 1-تارماعىندا تەك تۇرعىن ۇيدەن ايىرۋعا عانا ەمەس، سوتتىڭ شەشىمىنسىز ودان شىعارۋعا دا جول بەرمەيتىن تولىقتىرۋ كوزدەلگەنىن اتاپ ءوتتى. تۇرعىن ۇيگە باسىپ كiرۋگە، ونى قاراپ-تەكسەرۋگە، تiنتۋگە زاڭدا بەلگىلەنگەن جاعدايدا جانە كوزدەلگەن ءتارتiپپەن جول بەرiلەدi.
تالداۋ قورىتىندىلارى بويىنشا جاڭا كونستيتۋسيانىڭ كۇشىنە ەنۋ جانە 1995 جىلعى كونستيتۋسيانىڭ قولدانىسىن توقتاتۋ مەرزىمدەرىن رەگلامەنتتەيتىن نورمالار قوسىمشا كوزدەلگەن. جەكەلەگەن ەرەجەلەر ءبىرپالاتالى قۇرىلتايعا كوشۋ جانە ونىڭ سايلاۋىن وتكىزۋ ماسەلەلەرىن رەتتەيتىن بولادى. سپيكەر نورمالاردىڭ باسقا بولىگى لاۋازىمدى تۇلعالاردى تاعايىنداۋعا جانە جاڭا مەملەكەتتىك ورگانداردى قالىپتاستىرۋعا قاتىستى ەكەنىن اتاپ ءوتتى.
«كونستيتۋسيالىق كەڭەس پەن كونستيتۋسيالىق سوتتىڭ بۇرىن قابىلدانعان نورماتيۆتىك قاۋلىلارى اتا زاڭعا قايشى كەلمەيتىن بولىگىندە زاڭدى كۇشىن ساقتايتىنىن اتاپ وتكىم كەلەدى»، – دەدى باقىت نۇرمۇحانوۆ.
سوڭىندا ول جوبا ماتىندەرىنىڭ پىسىقتالعانى تۋرالى حابارلادى. سپيكەردىڭ ايتۋىنشا، كونستيتۋسيا جوباسىنىڭ مەملەكەتتىك جانە ورىس تىلدەرىندەگى ماتىندەرى بارىنشا جەتىلدىرىلگەن.
«ولاردا تەرمينولوگيالىق جانە سەمانتيكالىق بىرىزدىلىك قامتاماسىز ەتىلگەن. قۇقىقتىق نورمالاردىڭ تۇجىرىمدامالارى قولجەتىمدى جانە ولاردىڭ مازمۇنى بارشاعا تۇسىنىكتى ەتىپ جازىلعان. بۇل باعىتتا زاڭگەرلەر مەن لينگۆيست مامانداردان قۇرالعان جۇمىس توپتارىنىڭ ۇلكەن جۇمىسىن ەرەكشە اتاپ وتكىم كەلەدى. جاڭا كونستيتۋسيانىڭ پىسىقتالعان جوباسى كوميسسيا مەن جۇمىس توپتارىنىڭ وتىرىستارىندا جان-جاقتى تالقىلانىپ، قولداۋ تاپتى. كوميسسيا مۇشەلەرىنىڭ ازاماتتارمەن جانە زاڭ قوعامداستىعى وكىلدەرىمەن وتكىزگەن كەزدەسۋلەرىندە دە وڭ پىكىرلەر ايتىلدى»، - دەپ قورىتىندىلادى باقىت نۇرمۇحانوۆ.
