كونستيتۋسيالىق رەفورما جونىندەگى كوميسسيانىڭ 12-وتىرىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «اق جول» پارتياسى فراكسياسىنىڭ جەتەكشىسى ازات پەرۋاشيەۆ جاڭا كونستيتۋسيا جوباسىن قولدايتىنىن مالىمدەپ، ونى جالپىحالىقتىق رەفەرەندۋمعا شىعارۋدى ۇسىندى.
دەپۋتات جاڭا اتا زاڭنىڭ جوباسى بويىنشا شامامەن جارتى جىلعا سوزىلعان جۇمىس بارىسىندا فراكسيا پارلامەنتتىك رەفورماعا جانە قۇجاتتىڭ وزگە دە بولىمدەرىنە قاتىستى 50-دەن استام تۇزەتۋ جولداعانىن ايتتى.
پەرۋاشيەۆ كاسىپكەرلىك قۇقىعىن قورعاۋ، مەنشىك نىساندارىنىڭ الۋان تۇرلىلىگى مەن كەپىلدىكتەرىن ساقتاۋ، سونداي-اق بانك جانە كوممەرسيالىق قۇپيانى قورعاۋ تۋرالى ەرەجەلەر جاڭا كونستيتۋسياداعى وزگە دە جاڭاشىل نورمالارمەن بىرگە كاسىپكەرلەردىڭ زاڭدى قۇقىقتارىن قورعاۋعا، ينۆەستيسيالىق احۋالدى جاقسارتۋعا جانە جەكە بيزنەستىڭ دامۋىنا وڭ اسەر ەتەتىنىنە توقتالدى.
«ەلىمىزگە جاي عانا ينۆەستيسيا ەمەس، ەڭ وزىق تەحنولوگيالاردى اكەلۋگە مۇمكىندىك بەرەتىن «جەدەل داميتىن قالالارعا» ەرەكشە مارتەبە بەرۋ مۇمكىندىگىن اسا ماڭىزدى دەپ سانايمىز. ويتكەنى جاڭا ونىمدەر، تاۋارلار مەن قىزمەت تۇرلەرى پايدا بولعاندا، ولاردى رەتتەۋ تەتىكتەرى ءاردايىم ۇلگەرە بەرمەيدى»، – دەپ اتاپ ءوتتى ول.
فراكسيا جەتەكشىسى پارتيانىڭ ءبىر پالاتالى پارلامەنتكە كوشۋ قاجەتتىگى جونىندەگى ۇستانىمىن تاعى دا راستادى. ونىڭ ايتۋىنشا، پارتيا بۇل مودەلدى دايەكتى تۇردە جاقتاپ كەلەدى جانە كونستيتۋسيا جوباسى «اق جولدىڭ» ۇلتتىق بيزنەس پەن وتاندىق كاسىپكەرلەردىڭ مۇددەسىن قورعاۋ باعىتىنداعى كوزقاراستارى مەن قاعيداتتارىنا سايكەس كەلەدى.
«قۇجات جوعارى ۇيىمداستىرۋشىلىق ءارى مازمۇندىق دەڭگەيدە ازىرلەندى دەپ ەسەپتەيمىز. ارىپتەستەرىمىزدىڭ جاڭا كونستيتۋسيا جوباسىن جالپىحالىقتىق رەفەرەندۋمعا شىعارۋ جونىندەگى ۇسىنىسىن قولدايمىز»، – دەدى ازات پەرۋاشيەۆ.
