استانادا قازاقستان مەن جۇڭگو مادەنيەتىنىڭ توعىسپالى جىلىنىڭ جابىلۋ سالتاناتى ءوتتى، - دەپ حابارلايدى alnews.
قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىندا ەكى ەلدىڭ ونەر شەبەرلەرىنىڭ قاتىسۋىمەن كونسەرت ءوتتى. كوپشىلىك قازاقستان مەن قىتايدىڭ باي مادەني ءداستۇرىن تانىتاتىن تاقىرىپتىق كورمەنى تاماشالادى.
ءىس-شاراعا ق ر مادەنيەت جانە اقپارات ءمينيسترى ارمان قىرىقبايەۆ، قحر-دىڭ قازاقستانداعى ۋاقىتشا سەنىمدى وكىلى چەن كەفان، ق ر سىرتقى ىستەر ءمينيسترىنىڭ ورىنباسارى ارمان يساعالييەۆ، ديپلوماتيالىق كورپۋس وكىلدەرى، مادەنيەت جانە ونەر قايراتكەرلەرى قاتىستى.
ارمان قىرىقبايەۆ ەكى ەل اراسىنداعى قارىم-قاتىناستىڭ تاريحى تەرەڭدە جاتقانىن جانە حالىقتار دوستىعىن نىعايتۋدا مادەنيەتتىڭ ورنى ەرەكشە ەكەنىن اتاپ ءوتتى.
«قازاقستان مەن جۇڭگو حالىقتارىنىڭ تاريحي بايلانىستارى تەرەڭنەن باستاۋ الادى. مىڭ جىلدىق تاريحى بار ۇلى جىبەك جولى حالىقتارىمىزدى بايلانىستىرىپ، ساۋدا-ساتتىقتىڭ دامۋىنا، مادەنيەتتەردىڭ ىقپالداسۋىنا، ءبىلىم مەن عىلىم جەتىستىكتەرىنىڭ الماسۋىنا زور ىقپال ەتتى. وسى ورتاق تاريحي بەكەم بايلانىس بۇگىندە حالىقتارىمىز اراسىنداعى دوستىق پەن مادەني ديالوگتى نىعايتۋدىڭ ماڭىزدى نەگىزىنە اينالىپ وتىر.
مەملەكەت باسشىلارى قاسىم-جومارت كەمەل ۇلى توقايەۆ پەن ءتوراعا سي ءسزينپيننىڭ دوستىق پەن ءوزارا سەنىمگە نەگىزدەلگەن قارىم-قاتىناسى ارقاسىندا ەكىجاقتى ىنتىماقتاستىق مۇلدەم جاڭا مازمۇنعا يە بولدى. بيىلعى مادەنيەتتەر توعىسپالى جىلى اياسىندا حالىقتارىمىزدىڭ ءبىر-بىرىنىڭ مادەنيەتىنە، ءداستۇرى مەن تاريحىنا دەگەن قىزىعۋشىلىعى ارتا ءتۇستى.
ونەر – ۇلت پەن ۇلتتى، ەل مەن ەلدى جاقىنداستىرادى. سوندىقتان بۇگىنگى قازاقستان مەن جۇڭگو مادەنيەتىنىڭ توعىسپالى جىلىنىڭ جابىلۋ سالتاناتىن بەلگىلى ءبىر كەزەڭنىڭ اياقتالۋى ەمەس، كەرىسىنشە جاڭا مادەني باستامالارعا جول اشاتىن ماڭىزدى بەلەس دەپ بىلەمىز»، – دەدى مينيستر.
چەن كەفان مادەني-گۋمانيتارلىق بايلانىستى ودان ءارى دامىتۋدىڭ ماڭىزىنا توقتالدى. ءوز سوزىندە ول كەلەسى جىلى قازاقستان مەن جۇڭگو اراسىندا ديپلوماتيالىق قاتىناس ورناعانىنا 35 جىل تولاتىنىن ايتىپ، جۇڭگو تاراپى مادەنيەت، تۋريزم، جاستار ساياساتى، عىلىم جانە ءبىلىم سالالارىنداعى ىنتىماقتاستىقتى تەرەڭدەتۋگە دايىن ەكەنىن جەتكىزدى.
جىل ىشىندە قازاقستان مەن قىتايدا 40-قا جۋىق مادەني ءىس-شارا ۇيىمداستىرىلدى. ولاردىڭ قاتارىندا چجەسزيان پروۆينسياسىنىڭ مۋزەيىندە وتكەن «ۇلى دالا كوشپەلىلەرىنىڭ مادەنيەتى» كورمەسى، الماتىدا شانحاي ونەر كوللەكسياسى مۋزەيىمەن بىرلەسىپ ۇيىمداستىرىلعان كورمە، بەيجىڭدە ۇلتتىق دومبىرا كۇنىنە، اباي كۇنىنە جانە جامبىل جابايەۆتىڭ 180 جىلدىعىنا ارنالعان ءىس-شارالار بار.
مادەني ورتالىقتاردىڭ قىزمەتىن دامىتۋ –ىنتىماقتاستىقتىڭ ماڭىزدى باعىتتارىنىڭ ءبىرى. بەيجىڭدەگى قازاقستان مادەني ورتالىعى جۇڭگو جۇرتشىلىعىن ەلىمىزدىڭ مادەنيەتىمەن تانىستىرىپ كەلەدى. جىل سوڭىنا دەيىن استانادا جۇڭگو مادەني ورتالىعى اشىلماق.
كونسەرتتە مەدەت شوتابايەۆ، رۋحيا بايدۇكەنوۆا، «بىرلىك» بي ءانسامبلى، كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ دومبىراشىلار ءانسامبلى، نينبو قالالىق ءان جانە بي تەاترىنىڭ سوليستەرى چجاو لۋ مەن سيۋي يۋنسزيا ونەر كورسەتتى.
كونسەرت باعدارلاماسىندا قازاق كومپوزيتورى باقىتجان بايقاداموۆ پەن كورنەكتى جۇڭگو كومپوزيتورى سيان سينحايدىڭ دوستىعى ايرىقشا ورىن الدى. كومپوزيتورلاردىڭ شىعارماشىلىق بايلانىسى – ەكى حالىقتىڭ بىر-بىرىنە كورسەتكەن رياسىز قولداۋىنىڭ جارقىن ۇلگىسى. كەشتە وسى دوستىق تاريحىنا ارنالعان حورەوگرافيالىق قويىلىم مەن فوتوكورمە ۇسىنىلدى.
كوپشىلىك قىتايدىڭ ءداستۇرلى ونەرى مەن قولونەر بۇيىمدارىن، سونىڭ ىشىندە نينبو فارفورىن، ساندىك شامدار مەن ءورىپ جاسالعان قوڭىراۋلاردى تاماشالادى.
قازاقستان مەن جۇڭگو مادەنيەتىنىڭ توعىسپالى جىلى 2026 جىلعى 31 ناۋرىزدا بەيجىڭدە وتكەن سالتاناتتى گالا-كونسەرتپەن اشىلعان بولاتىن.
ءىس-شارانى قازاقستان رەسپۋبليكاسىنىڭ مادەنيەت جانە اقپارات مينيسترلىگى جۇڭگو حالىق رەسپۋبليكاسىنىڭ مادەنيەت جانە تۋريزم مينيسترلىگىمەن بىرلەسىپ ۇيىمداستىردى.
