قازاقستاندىق جاس دومبىراشىلار حالىقارالىق بايقاۋدا ۇزدىك اتانىپ، قازاقتىڭ ۇلتتىق ونەرىن الەمگە تانىتتى، - دەپ حابارلايدى alnews.
تۇركيانىڭ الانيا قالاسىندا وتكەن «Golden Stars Alanya» II حالىقارالىق بايقاۋىندا «ءالقيسسا» دومبىرا ستۋدياسى اسپاپتا ورىنداۋ جانرى بويىنشا باس جۇلدەگە يە بولدى.
بايقاۋدا جاس ەرەكشەلىكتەرىنە قاراي ونەر كورسەتكەن دومبىراشىلارىمىز «دومبىرا»، «كەلىنشەك»، «ەركە سىلقىم» جانە «سەكىرتپە» كۇيلەرىن ورىنداپ، قازىلار القاسى مەن كورەرمەندەردىڭ جوعارى باعاسىنا يە بولدى. قازاقستانمەن قاتار رەسەي، وزبەكستان، تۇركيا جانە باسقا دا مەملەكەتتەردىڭ ونەرپازدارى قاتىسقان حالىقارالىق ونەر دوداسىندا باس جۇلدەنى يەلەنۋ – ستۋديا ءۇشىن ۇلكەن جەتىستىك ءارى قازاق ونەرىنىڭ مەرەيى.
بۇل جەڭىس – جاس دومبىراشىلاردىڭ تالانتى مەن ۇستازدارىنىڭ كاسىبي ەڭبەگىنىڭ ناتيجەسى. ستۋديا شاكىرتتەرىنە دومبىرا ونەرىنەن نۇرعيسا تىلەندييەۆتىڭ تىكەلەي شاكىرتى قاناتبەك سادەن، «ىبىراي التىنسارين» توسبەلگىسىنىڭ يەگەرى عاليابانۋ ەربولعان، سونداي-اق بىلىكتى كاسىبي ماماندار رامازان اليحانوۆ پەن ايدانا سايرام ءدارىس بەرەدى. ۇستازداردىڭ باستى ماقساتى – بالالارعا كۇي ۇيرەتىپ قانا قويماي، ۇلتتىق ونەرگە دەگەن سۇيىسپەنشىلىگىن قالىپتاستىرىپ، قازاقتىڭ قارا دومبىراسىن الەمگە تانىتۋ.
«ءالقيسسا» دومبىرا ستۋدياسى بۇعان دەيىن دە حالىقارالىق دەڭگەيدە ونەر كورسەتكەن. 2026 جىلدىڭ ناۋرىز ايىندا اقش-قا بارعان ستۋديا شاكىرتتەرى نيۋ-يورك قالاسىنداعى ايگىلى Times Square الاڭى ماڭىندا كۇي شەرتىپ، قازاقتىڭ ۇلتتىق اسپابىن الەم جۇرتشىلىعىنا تانىتقان بولاتىن.
الانياداعى باس جۇلدە – وسى باعىتتاعى ەڭبەكتىڭ تاعى ءبىر جارقىن ناتيجەسى. ۇلتتىق ونەردى ۇلىقتاپ، قازاق كۇيىنىڭ شەكارا اسىپ، الەمدىك ساحنالاردا شىرقالۋىنا ۇلەس قوسىپ جۇرگەن جاس دومبىراشىلاردىڭ جەتىستىگى قۋانتادى.
قازاقتىڭ قارا دومبىراسىن تورگە وزدىرىپ، ەلىمىزدىڭ ابىرويىن اسقاقتاتقان «ءالقيسسا» ستۋدياسىنىڭ ونەرپازدارى مەن ۇستازدارىن باس جۇلدەمەن شىن جۇرەكتەن قۇتتىقتايمىز! باعىندىرار بەلەستەرىڭىز بيىك بولسىن!
