ناۋرىزباي اۋدانىندا كوشە مەن قوعامدىق كەڭىستىكتى كوگالداندىرۋ جۇمىستارى جالعاسىپ كەلەدى، - دەپ حابارلايدى alnews.
ماۋسىم باستالعالى Eco Almaty قىزمەتكەرلەرىمەن بىرلەسىپ جالپى اۋماعى 7 مىڭ شارشى مەتر جەرگە 252 مىڭ گۇل كوشەتى وتىرعىزىلدى. بۇل تۋرالى اۋدان اكىمدىگىنىڭ وكىلدەرى ايتتى.
گۇل كومپوزيسيالارى شۇعىلا شاعىناۋدانىندا، «الاتاۋ» شيپاجايى ماڭىندا، سابدەنوۆ كوشەسىندە جانە اباي داڭعىلىندا ورنالاستىرىلدى.
سونىمەن قاتار اباي جانە الاتاۋ داڭعىلدارىندا، سونداي-اق ءاشىموۆ، شالياپين، قونايەۆ جانە رىسقۇلوۆ كوشەلەرىندە تىك كوگالداندىرۋدىڭ 1 950 قۇرىلىمى ورناتىلدى.
«حالىق قاتىساتىن بيۋدجەت» باعدارلاماسى اياسىندا «الماتىنىڭ گۇل جۇماعى» ساياباعىنىڭ قۇرىلىسى قارقىن العان. نىساندا جەر جۇمىستارى جۇرگىزىلىپ، اعاش ەگىلىپ، سۋ قۇبىرى تارتىلدى جانە سىرتقى جارىقتاندىرۋ جەلىلەرىن ورناتۋعا ارنالعان ۋچاسكەلەر دايىندالدى. كورىكتەندىرۋ جۇمىستارى ءۇشىن 5 مىڭ شارشى مەترگە جۋىق كەسپەتاس ساتىپ الىنىپ، جيەكتاستاردى ورناتۋ جۇمىستارى قىزعان.
وسى باعدارلاما اياسىندا ءاشىموۆ كوشەسىندە كوگالداندىرۋ جانە اۆتوماتتى سۋارۋ جۇيەسىن ورناتۋ، جۇرگىنشى ايماقتارىن كورىكتەندىرۋ، كوشەلەردى جارىقتاندىرۋ جانە جوندەۋ جوبالارى دا جۇزەگە اسىرىلىپ جاتىر، دەپ مالىمدەدى ناۋرىزباي اۋدانى اكىمدىگىنىڭ وكىلدەرى.
