الماتىنىڭ جەتىسۋ اۋدانىندا قازىبايەۆ كوشەسىنىڭ بويىنداعى جۇرگىنشىلەر اللەياسى كوركەيتىلىپ، «جەتىسۋ» ساياباعى جاڭارتىلدى، - دەپ حابارلايدى alnews.
الماتى اكىمى دارحان ساتىبالدى جۇمىس ساپارى بارىسىندا اتقارىلعان جۇمىستاردىڭ ناتيجەسىمەن تانىستى.
قازىبايەۆ كوشەسىندە ۇزىندىعى 1 شاقىرىمنان اساتىن، جالپى اۋماعى 2،3 گەكتار جەر كوركەيتىلدى. مۇندا سەرۋەندەۋگە ارنالعان جول مەن جاڭا سكۆەرلەر سالىنىپ، كوگال توسەلدى، اۆتوماتتى جانە تامشىلاتىپ سۋارۋ جۇيەسى ورناتىلدى. كوگالداندىرۋ اياسىندا 21 مىڭنان استام بۇتا ەگىلدى. سونداي-اق 150 اعاش ەگۋ جۇمىسى جالعاسىپ جاتىر. ونىڭ 72ء-سى – ءىرى جوكە اعاشى، قالعان 78ء-ى – جاس كوشەت.
اۋماقتى سانيتارلىق تازالاۋعا ەرەكشە كوڭىل ءبولىندى. كوركەيتۋ جۇمىستارى بارىسىندا بۇل جەردەن 194 ساموسۆال قۇرىلىس قالدىعى شىعارىلدى. بۇرىن كۇتىمسىز جاتقان اۋماقتاردىڭ ورنىندا تۇرعىنداردىڭ سەرۋەندەۋىنە جانە دەمالۋىنا ارنالعان جاسىل ايماق پايدا بولدى.
ارالاۋ بارىسىندا دارحان ساتىبالدى تازالىق پەن سانيتارلىق ءتارتىپتى ساقتاۋ جۇمىستارىن كۇشەيتۋدى، كوركەيتىلگەن اۋماقتاردىڭ ءتيىستى كۇتىمىن قامتاماسىز ەتۋدى جانە زاڭسىز قوقىس ۇيىندىلەرىنىڭ قايتا پايدا بولۋىنا جول بەرمەۋدى تاپسىردى.
«جەتىسۋ» ساياباعىندا دا كوركەيتۋ جانە كوگالداندىرۋ جۇمىستارى جۇرگىزىلدى. تارتان جانە پليتا جابىنى توسەلىپ، 210 تۋيا، 720 بۇتا جانە 269 كوپجىلدىق وسىمدىك وتىرعىزىلدى. اۋماقتى جارىقتاندىرۋ ءۇشىن 153 جارىق شامى ورناتىلدى.
قالا اكىمى بوس جاتقان جەر اۋماقتارىن ودان ءارى كوركەيتۋ جايىنا دا ەرەكشە نازار اۋداردى. ول تۇرعىنداردىڭ قاجەتتىلىگىن ەسكەرە وتىرىپ، بۇل اۋماقتاردى ءتيىمدى پايدالانۋ جولىن، ونىڭ ىشىندە شاعىن سكۆەرلەر، جاسىل ايماق پەن كۇندەلىكتى دەمالىس ورىندارىن قۇرۋ مۇمكىندىگىن قاراستىرۋدى تاپسىردى.
قازىبايەۆ كوشەسىندەگى اللەيانى كوركەيتۋ جۇمىستارى دەمەۋشىلىك قاراجات ەسەبىنەن جۇرگىزىلدى.
قازىبايەۆ كوشەسىن كوركەيتۋ جەتىسۋ اۋدانىندا جۇرگىنشى باعىتتارى مەن قوعامدىق كەڭىستىكتەردىڭ ءبىرىڭعاي جۇيەسىن قالىپتاستىرۋ اياسىنداعى جۇيەلى جۇمىستىڭ ءبىر بولىگىنە اينالدى. جاقىن ماڭدا ءتورت ءبىلىم بەرۋ مەكەمەسى – ەكى بالاباقشا، مەكتەپ جانە كوللەدج ورنالاسقان. جاڭا اللەيا تۇرعىن ۇيلەردى الەۋمەتتىك نىساندارمەن بايلانىستىرىپ، بالالاردىڭ، اتا-انالار مەن ستۋدەنتتەردىڭ جاياۋ ءجۇرىپ-تۇرۋىنا قولايلى جاعداي جاسايدى.
«جەتىسۋ» ساياباعىن جاڭارتۋمەن قاتار، بۇل جۇمىستار اۋداننىڭ جاسىل ينفراقۇرىلىمىن دامىتۋعا، جۇرگىنشىلەرگە ىڭعايلى باعىت قالىپتاستىرۋعا جانە تۇرعىنداردىڭ ۇيىنە جاقىن جەردە قولجەتىمدى دەمالىس ورىندارىن قۇرۋعا باعىتتالعان.
