ەكولوگيالىق تازا قالا ءاربىر تۇرعىننىڭ ورتاق جاۋاپكەرشىلىگىمەن جۇزەگە اسادى. كەشە، 3 جەلتوقساندا قالامىزدىڭ ەكولوگيالىق جاعدايىن تاقىرىپ ەتكەن دوڭگەلەك ۇستەلدە وسىنداي تۇجىرىم جاسالدى. ءال-فارابي اتىنداعى قازۇۋ فيلوسوفيا جانە ساياساتتانۋ فاكۋلتەتىندە وتكەن شاراعا سالاداعى عالىمدار، وقىتۋشى-پروفەسسورلار، دوكتورانتتار مەن ستۋدەنتتەر قاتىسقان بولاتىن.
«الماتى قالاسىنىڭ ەكولوگيالى جاعدايى» اتتا دوڭگەلەك ۇستەلدى اتالعان فاكۋلتەتتىڭ پەداگوگيكا جانە ءبىلىم بەرۋ مەنەدجمەنتى كافەدراسى ۇيىمداستىردى. ءىس-شارانىڭ تىزگىنىن ۇستاعان م.اميركانوۆ دوڭگەلەك ۇستەلدىڭ ماقساتىمەن تانىستىرا وتىرىپ، بارلىق قاتىسۋشىلاردى قالا ەكولوگيانسىنا كوڭىل بۇرۋعا شاقىردى. تالقى بارىسىندا ءسوز العان كافەدرا مەڭگەرۋشىسى نۇرسۇلۋ الگوجايەۆا قالامىزدىڭ ەكولوگيالىق باستى پروبلمالارى جونىندە ايتىپ ءوتتى. سونىمەن بىرگە قالا تۇرعىندارىن جانە بارلىق جاستاردى سانالى تۇردە قورشاعان ورتا ماسەلەسىنە نازار اۋدارىپ، ونى قورعاۋعا دەگەن جاۋاپكەرشىلىگىن جوعارلاتۋ اسا ماڭىزدى ەكەنىن باسا ايتىپ كەتى. ءارى بۇل اتالعان ءىس-شارانىڭ دا باستى ماقساتىنىڭ ءبىرى ەكەنىن بەلگىلەدى.
سونىمەن قاتار وقىتۋشىلار قۇرامىنان ا.ق.دۇيسەنبايەۆ، ە.ت.بايارىستانوۆا، سونداي-اق قونايەۆ ۋنيۆەرسيتەتىنىڭ پروفەسسورى م.ا.سادىقوۆ قاتارلى قاتىسۋشىلار مەن قوناقتار كەزەگىمەن ءسوز الدى. سونداي-اق، تالقىعا قاتىسقان ستۋدەنتتەر دە تاقىرىپقا ساي ءوز ويلارىن ورتاعا سالدى.
شارانىڭ باستى ءمانى ستۋدەنتتەردىڭ دە قالا ەكولوگياسىنا قاتىستى وزدەرىنىڭ جاڭا ويلارىن ورتاعا سالۋى بولدى. ايتالىق، 4-كۋرس ستۋدەنتتەرىنەن سالىباي بالجان «سىنىپتان تىس جۇمىستار ارقىلى وقۋشىلارعا ەكولوگيالىق تاربيەنى قالىپتاستىرۋ» اتتى جۇمىسىندا مۇنداي تاربيەنى ورتا ءبىلىم بەرۋدەن باستاۋ كەرەكتىگىن العا تارتسا، جۇمابايەۆا الۋانىڭ «كليماتتىڭ وزگەرۋى جانە الماتى قالاسىنىڭ ەكولوگيالىق بولاشاعى» دەگەن پروبلەمالىق زەرتتەۋى ستۋدەنتتەرگە ۇلكەن وي سالدى. ال يباتوللا نۇر «اسپان استىنداعى قالا: الماتىنى سموگتان قالاي قۇتقارامىز؟» دەگەن بايانداماسىن تانىستىرىپ، وزەكتى پروبلەمانىڭ ماڭىزىن اشىپ كورسەتتى.
دوڭگەلەك ۇستەل بارىسىندا پروفەسسور مۇرات سادىقوۆ الماتى شاھارىنىڭ ەكولوگيالىق ءتۋريزمنىڭ جاستار ءۇشىن مۇمكىندىكتەرى مەن پايداسىنا جان-جاقتى توقتالدى. دوڭگەلەك ۇستەلگە قاتىسۋشىلار سپيكەرلەرگە سۇراقتار قويىپ، دوڭگەلەك ۇستەل تارتىمدى ءوتتى. دوڭگەلەك ۇستەل جۇمىسىن پەداگوگيكا جانە ءبىلىم بەرۋ مەنەدجمەنتى كافەدراسى مەڭگەرۋشىسىنىڭ عىلىم جانە يننوۆاسيالار جونىندەگى ورىنباسارى ا.ق.دۇيسەنبايەۆ قورىتىندىلاپ جاستارعا ەكولوگيانى بىرگە قورعاۋ كەرەكتىگىن باسا ايتىپ، ءىس-شاراعا قاتىسۋشىلارعا العىسىن ءبىلدىردى.
