اقپاننىڭ 5-نەن باستاپ وتاندىق كينوتەاترلاردا رەجيسسەر دۋمان ەركىمبەك پەن پروديۋسەر جالىن تىلەۋبەرگەننىڭ «عاشىقپىن ساعان» اتتى ءفيلمى جارىق كورەدى، - دەپ حابارلايدى Alnews.
فيلم اۆتورلارىنىڭ ايتۋىنشا، بۇل زاماناۋي الەمدەگى ماحابباتتىڭ ورنى مەن ادام ومىرىندەگى ءرولىن قايتا وي ەلەگىنەن وتكىزىپ، جاڭاشا باعامداۋعا تىرىسقان تىڭ تۋىندى.
سيۋجەت بويىنشا الماتىعا ارمان قۋىپ كەلگەن ەڭلىك تەزىرەك بايىپ كەتىپ، اۋىلداعى اناسى مەن ءىنىسىن قالاعا كوشىرىپ اكەلۋدى ماقسات ەتەدى. اكەسىز وسكەن قىز وقۋ مەن جۇمىستى قاتار الىپ ءجۇرىپ، ءومىردىڭ اۋىرتپالىعىنا قارسى تۇرۋعا تىرىسادى. الايدا ۇلكەن قالانىڭ ءوز زاڭدارى مەن كۇتپەگەن سىناقتارى بار. مىڭداعان تاعدىر توعىسقان قالادا ەڭلىك ءانشى بولۋدى ارماندايتىن ارمان دەگەن جىگىتپەن كۇتپەگەن جەردەن تانىسادى. بۇل كەزدەسۋ ەكى جاستىڭ ءومىرىن تۇبەگەيلى وزگەرتەدى. ەڭلىكتىڭ الدىندا ەكى تاڭداۋ تۇر. نە وتباسى ءۇشىن ءوز جولىن قۇربان ەتىپ بايلىققا قول جەتكىزۋ، نە ءوزى ءۇشىن ءومىر ءسۇرىپ، ماحابباتتى تاڭداۋ.
باس رولدەردە قازاق كينونىڭ جاس جۇلدىزدارى – شۇعىلا ەشەن جانە جاسۇلان كوپبەرگەن وينايدى. ەكى اكتەر وتكەن جىلى حيت بولعان Qaitadan فيلمىندە دە بىرگە تۇسكەن بولاتىن. سونىمەن قاتار شۇعىلا ەشەن «SHEKER. سوڭعى مۇمكىندىك» ءفيلمى ءۇشىن 2025 جىلى «سىنشىلار تاڭداۋى» جۇلدەسىنىڭ «ەكىنشى پلانداعى ۇزدىك ايەل ءرولى» نوميناسياسىندا جەڭىمپاز اتانعان. ەكىنشى پلاندا تانىمال اكتەرلەر ءابىلمانسۇر سەرىكوۆ، ساعىزباي قارابالين، ادەلينا ەرالييەۆا، ەربولات توعىزاقوۆ وينايدى.
«بۇل ءفيلمنىڭ يدەياسى بىزگە – جۇبايىم ەكەۋمىزگە، وسىدان جەتى جىل بۇرىن كەلگەن. ءدال ءقازىر ەلىمىزدە كينو جاقسى دامىپ جاتىر، الايدا ماحاببات جايلى فيلمدەر ءالى دە سيرەك. سوندىقتان وسى تاقىرىپتا فيلم تۇسىرگىمىز كەلدى. «عاشىقپىن ساعان» ءبىزدىڭ عانا وقيعا ەمەس، بۇل الماتىدا تانىسقان ميللونداعان جاستار، ميلليونداعان جۇپتار جايلى فيلم»، - دەيدى رەجيسسەر دۋمان ەركىمبەك.
پروديۋسەر جالىن تىلەۋبەرگەننىڭ ايتۋىنشا كينودا الماتىنىڭ ادەمى جەرلەرى كوپ كورسەتىلەدى. ءتىپتى ءفيلمىنىڭ العاشقى اتاۋى – «الماتىنىڭ ءبىز بىلمەيتىن كوشەلەرى» بولۋ كەرەك بولعان ەكەن. ايتا كەتسەك، جالىن مەن دۋمان وتكەن جىلى Qaitadan اتتى فيلمدەرىمەن كوزگە ءتۇسىپ، جاقسى كورسەتكىشتەرگە قول جەتكىزگەن – 2025 جىلدىڭ قورىتىندىسى بويىنشا تۋىندى پروكاتتا ءبىر ميلليارد تەڭگەدەن استام قاراجات جينادى.
سونىمەن بىرگە «عاشىقپىن ساعان» ءفيلمى اسەم ءان مەن مۋزىكاعا دا تولى – كارتينانىڭ كومپوزيتورلارى ولجاس دالەلحان («نۋريكامال») مەن سۇلتان تۇرسىنبەكوۆ («بولماعان بالالىق شاق»). مەلودرامادا ءانشى ARShAT-تىڭ بۇكىل جاستارعا «قاتىگەزدەۋ الماتى» اتىمەن تانىمال ءانى، dudeontheguitar-مەن بىرلەسىپ شىعارعان Gashyqpyn sagan ولەڭدەرى شىرقالادى.
Qaitadan ءفيلمىنىڭ اۆتورلارىنان جاڭا تۋىندى – «عاشىقپىن ساعان» مەلودراماسىن 5 اقپاننان باستاپ بارلىق كينوتەاترلاردان كورسەتىلەدى.
