قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆ «قايرات» فۋتبول كلۋبىنىڭ قاقپاشىسى تەمىرلان اناربەكوۆكە، جارتىلاي قورعاۋشى ولجاس بايبەككە جانە شابۋىلشى مانسۇر ءبىرقۇرمانوۆقا رەكتور گرانتىن سالتاناتتى تۇردە تابىستادى، - دەپ حابارلايدى alnews.
ارنايى وتكەن كەزدەسۋدە گرانت يەگەرلەرىنە سەرتيفيكاتتار تاپسىرىلىپ، جاس سپورتشىلاردىڭ بولاشاعىنا زور سەنىم ءبىلدىرىلدى. اكادەميا باسشىلىعى بۇل باستامانىڭ جاستاردى قولداۋ باعىتىنداعى مەملەكەتتىك ساياساتپەن ۇندەس ەكەنىن اتاپ ءوتتى.
ءوز سوزىندە اكادەميا وكىلدەرى سپورتتا دا، بىلىمدە دە ۇزدىك ناتيجە كورسەتىپ جۇرگەن ستۋدەنتتەرگە ءاردايىم قولداۋ كورسەتىلىپ كەلە جاتقانىن ايتىپ، بۇل ءۇردىس الداعى ۋاقىتتا دا جالعاساتىنىن جەتكىزدى.
ايتا كەتۋ كەرەك، اكادەميا پرەزيدەنتى قايرات زاكيريانوۆ جوعارى جەتىستىككە جەتكەن جاس سپورتشىلاردى تۇراقتى تۇردە قولداپ كەلەدى. بۇعان دەيىن ءدال وسىنداي رەكتور گرانتى «قايرات» فۋتبول كلۋبىنىڭ قاقپاشىسى شەرحان قالمۇرزاعا تابىستالعان بولاتىن.
قازاق سپورت جانە تۋريزم اكادەمياسى – تالاي ساڭلاق سپورتشىلاردى تۇلەتكەن ءبىلىم ورداسى. بۇگىنگى باستاما – سول يگى ءداستۇردىڭ زاڭدى جالعاسى ءارى ۇرپاقتار ساباقتاستىعىنىڭ ايقىن كورىنىسى.
بۇل كەزدەسۋ ءبىلىم مەن سپورتتى قاتار دامىتۋدىڭ، دارىندى جاستاردى ىنتالاندىرۋدىڭ جانە بولاشاق چەمپيوندارعا سەنىم ارتۋدىڭ جارقىن ۇلگىسىنە اينالدى.
