الماتىدا «الماتى – ءبىزدىڭ ورتاق ءۇيىمىز» قالالىق ناۋقانى جانە «تازا قازاقستان» رەسپۋبليكالىق باعدارلاماسى اياسىندا قوقىس جاشىكتەرىن تازالاۋدى باقىلاۋ بويىنشا جاڭا شارالار ەنگىزىلۋدە، - دەپ حابارلايدى alnews.
كوممۋنالدىق ينفراقۇرىلىمدى دامىتۋ باسقارماسى مونيتورينگ ناتيجەسىندە اۋزى-مۇرنىنان شىعىپ تولىپ جاتاتىن 52 ۋچاسكەنى انىقتادى. بۇل ماسەلەنى شەشۋ ءۇشىن سانيتارلىق تازارتۋ قىزمەتىنىڭ جۇمىسىن باقىلاۋ كۇشەيتىلدى.
قوقىس جاشىكتەرىن تازالاۋ بويىنشا قوسىمشا پاترۋلدىك مارشرۋتتار ەنگىزىلدى. كۇن سايىن ساعات 12:00-دەن 20: 00-گە دەيىن ەكى قىزمەتكەرى بار جۇك كولىكتەرى جۇمىسقا شىعادى. جاۋاپتى تۇلعالار ناقتى اۋماقتارعا تاعايىندالادى، بۇل تۋىنداعان تۇيتكىلدى ءمان بەرىپ، تەزدەتىپ شەشۋگە جول اشادى.
بۇگىندە قالادا 33 مىڭعا جۋىق قوقىس جاشىگى بار، شاھاردى 1 300-گە جۋىق ادام جانە 1 000-نان استام تەحنيكا تازالايدى. ديزاين كودقا سايكەس، جاڭا، سىيىمدىلىعى ۇلكەن قوقىس جاشىكتەرىن ساتىپ الۋ جوسپارلانىپ وتىر.
