22 قىركۇيەكتە الماتىدا قازاقستان تاۋەلسىزدىگىنىڭ 35 جىلدىعىنا ارنالعان «تاۋەلسىزدىكتىڭ 35 جىلدىعى» ارنايى تەلەجوباسىنىڭ ءتۇسىرىلىمى وتەدى، - دەپ حابارلايدى alnews.
«ايعاق» تەلەارناسى ازىرلەپ جاتقان جوبا اياسىندا تاۋەلسىزدىك مونۋمەنتى مەن «تاۋەلسىزدىك تاڭى» ەسكەرتكىشىندە ءتۇسىرىلىم جۇرگىزىلىپ، عالىم اسىلى وسمانمەن ارنايى سۇحبات ۇيىمداستىرىلادى.
تەلەجوبا قازاقستاننىڭ تاۋەلسىزدىك جولىنداعى تاريحي كەزەڭدەرىن كەڭىنەن تانىتۋعا، ەل ازاتتىعى مەن مەملەكەتتىڭ قالىپتاسۋىنا ۇلەس قوسقان تۇلعالاردىڭ ونەگەلى ءومىرىن دارىپتەۋگە، سونداي-اق تاريحي ورىنداردى ناسيحاتتاۋعا باعىتتالعان.
الماتىداعى ءتۇسىرىلىم باعدارلاماسى رەسپۋبليكا الاڭىنداعى تاۋەلسىزدىك مونۋمەنتىنەن باستالادى. 1996 جىلى تاۋەلسىزدىكتىڭ بەس جىلدىعىنا وراي اشىلعان مونۋمەنتتىڭ بيىكتىگى – 28 مەتر. ونىڭ توبەسىندە قاناتتى بارىستى تىزگىندەگەن التىن ادام بەينەسى ورنالاسقان.
جوبا قاتىسۋشىلارى ساتبايەۆ پەن جەلتوقسان كوشەلەرىنىڭ قيىلىسىنداعى «تاۋەلسىزدىك تاڭى» ەسكەرتكىشىنە دە بارادى.
باعدارلاما اياسىندا فيلولوگيا عىلىمدارىنىڭ دوكتورى، پروفەسسور، قازاقستاننىڭ ەڭبەك سىڭىرگەن قايراتكەرى اسىلى وسمانمەن سۇحبات جوسپارلانعان. سۇحبات بارىسىندا تاۋەلسىزدىك قۇندىلىعى، مەملەكەتتىك ءتىل، ۇلتتىق سانا مەن تاريحي جاد ماسەلەلەرى ءسوز بولادى.
بۇدان كەيىن جوبا قاتىسۋشىلارى كەڭساي-2 زيراتىنا بارىپ، قازاقستاننىڭ حالىق جازۋشىسى شەرحان مۇرتازا، كورنەكتى جازۋشى-دراماتۋرگ ورالحان بوكەي، مەملەكەت قايراتكەرلەرى قالىق ابدۋللايەۆ پەن بەردىبەك ساپاربايەۆتىڭ رۋحىنا تاعزىم ەتپەك.
«تاۋەلسىزدىكتىڭ 35 جىلدىعى» تەلەجوباسى ەلىمىزدىڭ بىرنەشە ءوڭىرى مەن ءىرى قالالارىن قامتيدى. جوبا اۆتورلارى تاريحي ورىندار مەن تۇلعالار تاعىلىمىن كورسەتۋ ارقىلى تاۋەلسىزدىكتىڭ قادىر-قاسيەتىن جاس ۇرپاققا جەتكىزۋدى كوزدەپ وتىر.
