الماتىدا قالا كۇنىن ەكى كۇن بويى مەرەكەلەۋ اياقتالدى. 19 جانە 20 قىركۇيەكتە قالانىڭ نەگىزگى الاڭدارىندا جانە بارلىق سەگىز اۋداندا كونسەرتتەر، فەستيۆالدەر، كورمەلەر، سپورتتىق جانە شىعارماشىلىق ءىس-شارالار ءوتتى. ەكى كۇن ىشىندە ولارعا 1 ملن-نان استام قالا تۇرعىنى مەن قوناعى قاتىستى. بۇل تۋرالى الماتى قالاسى مادەنيەت باسقارماسىنىڭ وكىلدەرى حابارلادى.
اباي الاڭىندا الماتى اكىمى دارحان ساتىبالدىنىڭ قاتىسۋىمەن سالتاناتتى كونسەرت ءوتىپ، «الماتى قالاسىنىڭ قۇرمەتتى ازاماتى» اتاعىن تابىستاۋ ءراسىمى ۇيىمداستىرىلدى. سونداي-اق، «سازگەن سازى» فولكلورلىق-ەتنوگرافيالىق ءانسامبلى، قازاق مەملەكەتتىك سيركىنىڭ ارتيستەرى، ASU ۇجىمى جانە «الاتاۋ» ءداستۇرلى ونەر تەاترى ونەر كورسەتتى. بۇدان بولەك، پيانيست Ratovich، NE PROSTO ORCHESTRA جانە «D Billions» حالىقارالىق مۋزىكالىق شوۋى كورەرمەندەرگە مەرەكەلىك كوڭىل كۇي سىيلادى.
قوناقتار ءۇشىن تاقىرىپتىق جانە بالالار ايماقتارى، AI & ROBOT ZONE، كرافت ويىندار الاڭى جانە كاسىبي سۋرەتشىلەردىڭ «اجارلى الماتى» اتتى تۋىندىلار كورمەسى جۇمىس ىستەدى.
استانا الاڭىندا كۇندىزگى كونسەرتتىك باعدارلامالار، «Almaty Vibes» مۋزىكالىق فەستيۆالى جانە «Almaty Zhuldyzy» كونسەرتى ءوتتى. الماتى تاريحىنا ارنالعان 3D Mapping Show مەرەكەنىڭ باستى وقيعالارىنىڭ بىرىنە اينالدى.
پانفيلوۆ جانە جىبەك جولى كوشەلەرىندە كونسەرتتەر، شىعارماشىلىق باعدارلامالار جانە قۋىرشاق تەاترىنىڭ قويىلىمدارى ۇيىمداستىرىلدى. Kitap Fest كىتاپ جارمەڭكەسى 60-تان استام باسپا مەن كىتاپ دۇكەنىنىڭ باسىن قوسىپ، 50 مىڭنان استام كەلۋشىنى جينادى.
ءىرى ءىس-شارالاردىڭ ءبىرى الما جارمەڭكەسى بولدى. ەكى كۇن ىشىندە مۇندا جەرگىلىكتى وندىرۋشىلەر مەن شارۋا قوجالىقتارى ۇسىنعان 50 سۇرىپتاعى 250 توننادان استام الما ساتىلدى.
«الاتاۋ» ءداستۇرلى ونەر تەاترى الدىنداعى الاڭدا تانىمال ورىنداۋشىلار مەن شىعارماشىلىق ۇجىمداردىڭ قاتىسۋىمەن «ءان مەن كۇيدىڭ بەسىگى»، «Jana Lep» جانە «الماتىعا ماحابباتپەن» كونسەرتتەرى ءوتتى.
مەرەكەلىك كۇندەرى ماسانچي كوشەسىنىڭ ساتبايەۆ داڭعىلىنان اباي داڭعىلىنا دەيىنگى بولىگىندە العاشقى گاسترونوميالىق كوشە دە اشىلدى. مۇندا قوعامدىق تاماقتانۋ ورىندارى مەن كوركەيتىلگەن قوعامدىق كەڭىستىك ءبىر اۋماقتا توعىستىرىلدى. بۇل الماتىدا گاسترونوميالىق كوشەلەر جەلىسىن قۇرۋ اياسىندا جۇزەگە اسىرىلعان العاشقى جوبا.
قالانىڭ بارلىق سەگىز اۋدانى دا باعدارلامالارىن دايىندادى. تۇرعىندار ءۇشىن كونسەرتتەر، سپورتتىق جارىستار، كورمەلەر، شەبەردىڭ ساباقتارى، وتباسىلىق جانە بالالارعا ارنالعان ءىس-شارالار ۇيىمداستىرىلدى.
