الماتى حالىق سانى جاعىنان رەسپۋبليكانىڭ كوش باسىنداعى قالا. ەلىمىزدەگى ۋربانيزاسيا ءۇردىسى، ىشكى كوشى-قون جانە دەموگرافيالىق جاعدايدىڭ ناتيجەسىندە الماتى حالقىنىڭ سانى دا جىل سايىن ارتۋدا. بۇل ءوز كەزەگىندە قالانىڭ ينفراقۇرىلىمى مەن وزگە دە الەۋمەتتىك سالالارىنداعى قىسىمدى ارتتىرۋدا. سونىڭ ءبىرى ءبىلىم بەرۋ سالاسى.
مەكتەپ جاسىنداعى بالالار سانى بويىنشا دا الماتى رەسپۋبليكانىڭ كوش باسىندا. بيىلعى وقۋ جىلىمەن قاراستىرعاندا قالادا 336 486 مىڭ وقۋشى مەكتەپ قابىرعاسىندا ءبىلىم الۋدا. ال قالاداعى ورتا ءبىلىم بەرۋ مەكەمەلەرىنىڭ جالپى سانى 337 بولسا، ونىڭ 215ء-ى مەملەكەتتىك، 122ء-ى جەكەمەنشىك ءبىلىم بەرۋ مەكەمەسى سانالادى.
اتاپ وتكەنىمىزدەي، مەكتەپ جاسىنداعى بالالار سانى جىل سايىن ون مىڭداپ كوبەيىپ وتىرعاندىقتان، قالادا وقۋشى ورىندارىنىڭ تاپشىلىعى بار. الماتى قالاسى ءبىلىم باسقارماسىنىڭ دەرەگىنە قاراعانشا ءقازىر شاھاردا مەكتەپ جاسىنداعى بالالار سانى جىل سايىن 12-14 مىڭعا كوبەيۋ ۇستىندە. ايتالىق، بىلتىرعى وقۋ جىلىندا 13 086 وقۋشى 11-سىنىپتى بىتىرسە، 8130 تۇلەك 9-سىنىپتى بىتىرگەن. سونىڭ وزىندە مەكتەپ تابالدىرىعىن اتتاعان بالالار سانى بۇدان ءبىر ەسەدەن كوپ. ياعني، بيىلعى جاڭا وقۋ ماۋسىمىندا الماتىدا 28 144 بالا مەكتەپ تابالدىرعىن اتتاعان. بۇل سوڭعى جىلدارداعى تۇراقتى ۇردىسكە اينالعان.
مەكتەپ جاسىنداعى بالالاردىڭ 300 797ء-سى مەملەكەتكە قاراستى ءبىلىم بەرۋ مەكەمەلەرىندە ءبىلىم الادى. ال جەكەمەنشىك مەكەمەلەردەگى وقۋشىلار سانى 35 689. الماتى شاھارىندا قازىرگى وقۋشى ورىندارىنىڭ تاپشىلىعى 30 878 ء-دى قۇرايدى.
الماتى قالاسى اكىمدىگى جاعىنان قالاداعى وقۋشى ورىندارى تاپشىلىعى ماسەلەسى باستى نازاردا ۇستالىپ كەلەدى. پرەزيدەنت قاسىم-جومارت توقايەۆتىڭ باستاماسىمەن جۇزەگە اسىرىلىپ كەلە جاتقان «جايلى مەكتەپ» ۇلتتىق جوباسى اياسىندا دا قالادا جاڭا مەكتەپتەر سالىنۋ ۇستىندە. ايتالىق اتالمىش ۇلتتىق جوبا ارقىلى الماتىدا 36800 وقۋشىعا ارنالعان 22 مەكتەپ سالىنۋدا. ايتا كەتەيىك، جاڭادان سالىنىپ جاتقان 22 مەكتەپتىڭ 13ء-ى «Samruk-Kazyna Construction» اق تاپسىرىسى بويىنشا سالىنۋدا. ۇلتتىق جوبا اياسىنداعى مەكتەپ قۇرىلىستارى اياقتالسا 36800 وقۋشى ورنى پايدالا بولادى.
