الماتى جاستارى «وقيتىن ۇلت» جالپىۇلتتىق مارافونى اياسىندا كىتاپ وقۋ چەمپيوناتىنا قاتىسىپ، اقشالاي سىيلىق ۇتىپ الا الادى. ول ءۇشىن ۇسىنىلعان ءتورت شىعارمانىڭ ءبىرىن وقىپ، سول كىتاپ تۋرالى بەينەرەسەنزيا دايىنداۋ قاجەت. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى ايتتى.
بايقاۋدى الماتى قالاسى جاستار ساياساتى باسقارماسىنىڭ قولداۋىمەن Skill All قىسقامەرزىمدى كۋرستارىنىڭ جوبالىق كەڭسەسى ۇيىمداستىرىپ وتىر. ونىڭ ماقساتى – جاستاردىڭ كىتاپ وقۋعا قىزىعۋشىلىعىن ارتتىرۋ، سىني ويلاۋ قابىلەتىن دامىتۋ جانە پىكىرىن دالەلمەن جەتكىزۋگە ۇيرەتۋ.
قاتىسۋشىلار مىنا ءتورت شىعارمانىڭ ءبىرىن تاڭداي الادى: سايىن مۇراتبەكوۆتىڭ «جۋسان ءيىسى»، ولجاس سۇلەيمەنوۆتىڭ «از ي يا»، ماري فاۆەرونىڭ «التىن وردا. دالا يمپەرياسى الەمدى قالاي وزگەرتتى» جانە ارمان المەنبەتتىڭ «تەرگەۋشى» كىتاپتارى.
تاڭدالعان شىعارما تۋرالى ۇزاقتىعى 1-3 مينۋت بولاتىن بەينەرەسەنزيا ءتۇسىرۋ كەرەك. وندا كىتاپتىڭ نەگىزگى يدەياسىن اشىپ، شىعارمادان كەمىندە ەكى مىسال كەلتىرۋ جانە جەكە قورىتىندى جاساۋ قاجەت.
بايقاۋعا قاتىسۋ ءۇشىن تىركەلىپ، Instagram جەلىسىندە تاڭدالعان كىتاپتىڭ اتاۋى مەن #oqitynult حەشتەگى كورسەتىلگەن جازبا جاريالاۋ كەرەك. دايىن بەينەرەسەنزيا دا وسى حەشتەگپەن جاريالانۋعا ءتيىس.
جۇمىس ءتورت ولشەم بويىنشا باعالانادى: شىعارمانىڭ مازمۇنىن ءتۇسىنۋ، پىكىردى دالەلدەۋ دەڭگەيى، وي تۇجىرىمدارىنىڭ دەربەستىگى، بايانداۋدىڭ قيسىندىلىعى مەن تۇسىنىكتىلىگى. ەڭ جوعارى باعا – 100 ۇپاي.
چەمپيوناتتىڭ جالپى جۇلدە قورى 400 مىڭ تەڭگە. جەڭىمپازعا 100 مىڭ تەڭگە، ەكىنشى ورىن العان ەكى قاتىسۋشىعا 75 مىڭ تەڭگەدەن، ال جۇلدەلى ورىن يەلەنگەن تاعى ءۇش قاتىسۋشىعا 50 مىڭ تەڭگەدەن بەرىلەدى.
بەينەرەسەنزيالار 19 قازانعا دەيىن قابىلدانادى. 20-22 قازان ارالىعىندا قازىلار القاسى جۇمىستاردى باعالايدى، ال 23 قازاندا قورىتىندى ءىس-شارا ءوتىپ، جەڭىمپازدار جاريالانىپ، ماراپاتتار تابىستالادى.
ۇيىمداستىرۋشىلار چەمپيونات جاستاردىڭ كلاسسيكالىق جانە زاماناۋي ادەبيەتكە قىزىعۋشىلىعىن ارتتىرىپ قانا قويماي، وقىعان كىتاپتارى تۋرالى پىكىر الماسىپ، شىعارمالاردى تەرەڭىرەك تالقىلاۋعا جول اشادى دەپ سەنەدى.
