الماتىدا پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆانىڭ توراعالىعىمەن شىعارماشىلىق زيالى قاۋىم وكىلدەرى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسى ءۇشىن!» جالپىۇلتتىق كواليسياسى مۇشەلەرىمەن كەزدەستى، - دەپ حابارلايدى alnews.
ءىس-شاراعا دەپۋتاتتار، الەۋمەتتانۋشىلار، وتاندىق كينو جانە مۋزەي سالاسىنىڭ وكىلدەرى، شىعارماشىلىق بىرلەستىكتەر، مەدياقاۋىمداستىق جانە كرەاتيۆتى ۇيىمدار قاتىستى.
جيىن جاڭا كونستيتۋسيا جوباسىنا جانە 15 ناۋرىزعا جوسپارلانعان رەسپۋبليكالىق رەفەرەندۋمعا ارنالدى. كەزدەسۋدە ايدا بالايەۆا اتا زاڭ جوباسىندا ادامي كاپيتالعا ايرىقشا ءمان بەرىلگەنىن، ال مادەنيەت پەن تاريحي مۇرانى ساقتاۋ جاڭارتىلعان كونستيتۋسيادا جوعارى دەڭگەيگە كوتەرىلگەنىن اتاپ ءوتتى.
«ءبىلىم، عىلىم، مادەنيەت جانە يننوۆاسيا سالالارىنا ەرەكشە ءمان بەرىلىپ، ۇلتتىق مادەنيەتتى قولداۋ مەن تاريحي-مادەني مۇرانى ساقتاۋ كونستيتۋسيالىق قاعيدات دەڭگەيىنە كوتەرىلدى. بۇل مەملەكەتتىڭ بولاشاعى تابيعي رەسۋرستارعا عانا ەمەس، ەڭ الدىمەن ءبىلىمدى، زياتكەرلىك الەۋەتى جوعارى ازاماتتارعا سۇيەنەتىنىن كورسەتەدى. ءسوز جوق، ۇلتتىق مادەنيەتتى قولداۋ جانە تاريحي-مادەني مۇرانى ساقتاۋ ۇعىمدارىنىڭ العاش رەت كونستيتۋسيالىق دەڭگەيدە بەكىتىلۋى ءبىز ءۇشىن ۇلكەن قۋانىش ءارى زور جاۋاپكەرشىلىك. سونداي-اق ەل ازاماتتارى تاريحي جانە مادەني مۇرانىڭ ساقتالۋىنا قامقور بولۋعا، تاريح پەن مادەنيەت ەسكەرتكiشتەرiنە ۇقىپتى قاراۋعا مiندەتتi ەكەنى دە انىق كورسەتىلگەن. اتالعان جاڭاشىلدىق ۇلتتىق بىرەگەيلىكتى نىعايتۋعا، تاريحي ساباقتاستىقتى ساقتاۋعا جانە ۇلتتىق كود پەن مادەني مۇرانى كەلەر ۇرپاققا جەتكىزۋگە جول اشادى»، – دەدى ايدا بالايەۆا.
مەديامەنەدجەر، قازاقستاننىڭ ەڭبەك سىڭىرگەن قايراتكەرى نۇرجان مۇحامەدجانوۆا جوبا زاڭ ۇستەمدىگى مەن قوعامدىق قاتىسۋ قاعيداتتارىن كۇشەيتەتىنىن، سونىڭ ىشىندە سيفرلىق ورتاداعى ازاماتتاردىڭ قۇقىعىن قورعاۋعا كەپىلدىك بەرەتىنىن ايتتى.
وتىرىستا رەجيسسەر تالعات تەمەنوۆ ەل ءۇشىن ماڭىزدى كەزەڭدە ءار ازاماتتىڭ جاۋاپكەرشىلىگى ارتا تۇسەتىنىن اتاپ ءوتتى.
«ەل تاريحىندا كونستيتۋسيا العاش رەت قازاق تىلىندە جازىلدى. مەن وسىعان قۋاندىم. ەكىنشى قۋانعانىم، ءبىر پالاتالى پارلامەنت ياعني قۇرىلتايدى قۇرۋ باستاماسى بولدى. ءۇشىنشى، پرەزيدەنتتىڭ ءبىر-اق مارتە سايلانۋى. اتا زاڭنىڭ ءار تارماعى – قازاقتىڭ ەرتەڭى، ءۇمىتى مەن بولاشاعى. كەلەر ۇرپاق ءۇشىن بىرىگىپ، رەفەرەندۋمعا قاتىسۋىمىز وتە ماڭىزدى»، – دەدى ول.
كينو پروديۋسەرى جالىن تىلەۋبەرگەن جاڭا كونستيتۋسيا جوباسى كرەاتيۆتى ەكونوميكا مەن كرەاتيۆتى يندۋستريانى دامىتۋ باعىتىن ايقىندايتىنىن جەتكىزدى.
«كونستيتۋسيالىق دەڭگەيدە ءسوز بوستاندىعىنا، عىلىمي، تەحنيكالىق جانە كوركەم شىعارماشىلىق ەركىندىككە كەپىلدىك بەرىلىپ، زياتكەرلىك مەنشىك قورعالسا، بۇل جاس رەجيسسەرلەر مەن اكتەرلەر ءۇشىن بەرىك تىرەك بولار ەدى. باستى رەسۋرس – شيكىزات ەمەس، ازاماتتاردىڭ يدەياسى، ويى، دارىنى مەن ەڭبەگى. ال رەفەرەندۋمعا قاتىسۋ ونەر مەن قوعام اراسىنداعى بايلانىستى كۇشەيتەتىنى انىق»، – دەدى ول.
كەزدەسۋ سوڭىندا كواليسيا مۇشەلەرى قاتىسۋشىلارمەن پىكىر الماسىپ، ويىن ورتاعا سالدى. بيىل 15 ناۋرىز كۇنى ازاماتتار جاڭا كونستيتۋسيا جوباسى بويىنشا ءوز ۇستانىمىن بىلدىرەتىنىن ايتتى.
