الماتىدا اكىمشىلىك قۇقىق بۇزۋشىلىقتار بويىنشا ۇستالعان كولىك قۇرالدارىن ەۆاكۋاسيالاۋ جانە مامانداندىرىلعان ايىپپۇل تۇراقتارىنىڭ قىزمەتىن رەتتەۋدىڭ جاڭا تاسىلدەرى قاراستىرىلۋدا، - دەپ حابارلايدى alnews.
ۇسىنىلىپ وتىرعان شارالار راسىمدەردىڭ اشىقتىعىن ارتتىرۋعا، مامانداندىرىلعان تۇراقتاردىڭ جۇمىسىن ءبىرىڭعاي جۇيەگە كەلتىرۋگە جانە كولىك قۇرالدارىن ەۆاكۋاسيالاۋ تەتىكتەرىن جەتىلدىرۋگە باعىتتالعان.
وزگەرىستەردىڭ نەگىزگى ماقساتتارىنىڭ ءبىرى – جول قوزعالىسى ەرەجەلەرىن بۇزۋدىڭ الدىن الۋ جانە جۇرگىزۋشىلەردىڭ جاۋاپكەرشىلىگىن ارتتىرۋ. وسى ماقساتتا ۇستالعان كولىك قۇرالدارىن ەۆاكۋاسيالاۋ مەن ساقتاۋ بويىنشا ءبىرىڭعاي ءتارتىپ ەنگىزۋ، سونداي-اق اتالعان قىزمەتتەرگە ەكونوميكالىق تۇرعىدان نەگىزدەلگەن تاريفتەر بەلگىلەۋ ۇسىنىلادى.
قازىرگى ۋاقىتتا كولىك قۇرالىن ەۆاكۋاسيالاۋ ءتاريفىن 6 ايلىق ەسەپتىك كورسەتكىش (اەك) مولشەرىندە بەلگىلەۋ ماسەلەسى قاراستىرىلۋدا. ايىپپۇل تۇراقتارىندا ساقتاۋ قۇنى كولىك قۇرالىنىڭ ساناتىنا قاراي ايقىندالادى: موتوسيكلدەر مەن ەكى دوڭعالاقتى كولىكتەر ءۇشىن 1 اەك-تەن باستاپ، سالماعى 12 توننادان اساتىن ءىرى گاباريتتى كولىك قۇرالدارى ءۇشىن العاشقى تاۋلىككە 4،5 اەك-كە دەيىن بەلگىلەۋ ۇسىنىلادى. بۇل رەتتە كولىك قۇرالى مامانداندىرىلعان تۇراققا قويىلعان كۇن ءۇشىن تولەم الىنبايدى.
سونداي-اق ەۆاكۋاسيا قىزمەتى ءۇشىن تولەمنەن بوساتىلاتىن جاعدايلار دا قاراستىرىلعان. اتاپ ايتقاندا، توتەنشە جاعدايلار كەزىندە نەمەسە كولىك قۇرالى ايىپپۇل تۇراعىنا جەتكىزىلمەي باسقا ورىنعا عانا جىلجىتىلعان جاعدايدا ەۆاكۋاسيا ءۇشىن اقى الىنبايدى.
كۇتىلىپ وتىرعان وزگەرىستەر جول قوزعالىسى ەرەجەلەرىنىڭ توقتاۋ جانە تۇراققا قويۋ تالاپتارىن بۇزۋ جاعدايلارىن ازايتۋعا، جۇرگىزۋشىلەر ءتارتىبىن ارتتىرۋعا، كولىك قۇرالدارىنىڭ ساقتالۋىن قامتاماسىز ەتۋگە، ەۆاكۋاسيالاۋ جانە ساقتاۋ قىزمەتتەرىن كورسەتۋدىڭ ءبىرىڭعاي ستاندارتتارىن قالىپتاستىرۋعا، سونداي-اق جۇيەنى ازاماتتار ءۇشىن اناعۇرلىم تۇسىنىكتى ءارى قولايلى ەتۋگە مۇمكىندىك بەرەدى.
