«الماتى قالا جارىق» كومپانياسى قالادا كەيدە شامنىڭ كۇندىز نەلىكتەن جانىپ تۇراتىنىن ءتۇسىندىردى، دەپ حابارلايدى alnews.
«الماتى قالا جارىق» مكك باسشىسى يگور مىسيك zakon.kz سايتىنا بەرگەن سۇحباتىندا ايتقانداي، 90% جاعدايدا بۇل شام اۋىستىرۋ، جەلىنى تەكسەرۋ، ۇزىلگەن نەمەسە قىسقا تۇيىقتالۋ ورىندارىن انىقتاۋ سىندى جوندەۋ-قالپىنا كەلتىرۋ جۇمىستارىنا بايلانىستى.
سونداي-اق، ول سىرتقى جارىقتاندىرۋ قىزمەتى اۋداندىق اكىمدىكتەرگە بەرىلگەننەن كەيىن ماسەلەنىڭ الدەقايدا جىلدام شەشىلىپ جاتقانىن اتاپ ءوتتى. «قازىرگى ۋاقىتتا 40-تان استام جوندەۋ بريگاداسى جۇمىس ىستەۋدە، جۇمىستار تاۋلىك بويى، دەمالىسسىز جۇرگىزىلەدى، سونىڭ ارقاسىندا ءوتىنىشتى قاراۋ مەرزىمى بىرنەشە ەسە قىسقاردى جانە ءارى كەتسە ەڭ كوپ دەگەندە ەكى اپتا ۋاقىت الادى. ءبىراق ءبىز ولاردى ودان دا تەزىرەك ورىندايمىز»، – دەدى ول.
اقج بۇگىندە ساپاسىز ءارى ارزان شام ساتىپ الۋدان باس تارتتى، ويتكەنى ولار كۇڭگىرت جارىق بەرىپ، تەز ىستەن شىعادى. الايدا يگور مىسيكتىڭ ايتۋىنشا، بۇعان دەيىن وسىنداي ءونىمدى جەتكىزگەن كومپانيالار تەندەرگە قايتا قاتىسۋعا تىرىسىپ جاتىر. «كەيدە تەندەر ناتيجەسىن جويۋعا تۋرا كەلەدى، بۇل سوتقا جۇگىنەمىز، قويمامىزداعى شامداردىڭ تاۋسىلۋىنا اكەلەدى. سول كەزدە تۇرعىنداردىڭ وتىنىشتەرىنە ۋاقىتىلى جاۋاپ بەرە المايمىز»، - دەيدى ول. مىسيك قازىرگى ۋاقىتتا قاجەتتى مولشەردە شامداردىڭ بار ەكەنىن جانە ءوتىنىشتى ورىنداۋدا ەشقانداي ماسەلە جوق ەكەنىن جەتكىزدى.
