قازاقستاننىڭ ەڭ ءىرى قالاسى ءارى بۇرىنعى استاناسى الماتى ورتالىق ازياداعى باستى گاسترونوميالىق باعىتتاردىڭ ءبىرى رەتىندە تانىلدى. امەريكانىڭ بەدەلدى Eater باسىلىمى قالانى 2026 جىلعا ارنالعان «Where to Eat» – تاعامسۇيەر قاۋىم مىندەتتى تۇردە بارۋى ءتيىس باعىتتار تىزىمىنە ەنگىزدى. بۇل تۋرالى الماتى قالاسى تۋريزم باسقارماسىنىڭ وكىلدەرى حابارلادى.
Eater – مەيرامحانالار مەن گاسترونوميا تۋرالى الەمدەگى ەڭ ىقپالدى باسىلىمداردىڭ ءبىرى. ونىڭ تىزىمىنە ەنۋ قالانىڭ حالىقارالىق تانىمالدىلىعىن ارتتىرىپ، گاسترونوميالىق ءتۋريزمنىڭ دامۋىنا وڭ ىقپال ەتەدى.
باسىلىمنىڭ باعالاۋىنشا، سوڭعى جىلدارى الماتى ءوڭىردىڭ ماڭىزدى اسپازدىق ورتالىعىنا اينالدى. مۇندا ورتالىق ازيانىڭ تۇكپىر-تۇكپىرىنەن كەلگەن باس اسپازداردىڭ باسىن قوسقان العاشقى Almaty Food Fest فەستيۆالى ءوتتى جانە قالانىڭ العاشقى رەسمي گاسترونوميالىق گيدى جارىق كوردى. الماتىنىڭ تاعام مادەنيەتى كوشپەلى قازاق داستۇرلەرىن ۇيعىر، ورىس، وزبەك، كورەي، تۇرىك جانە ءۇندى اسپازدىق ونەرىمەن ۇيلەستىرە بىلگەن. ەت، قازى، سامسا، باۋىرساق پەن لاعمان سياقتى ۇلتتىق تاعامدار وسى مادەني الۋاندىقتىڭ جارقىن كورىنىسى سانالادى. ءداستۇرلى دامدەردى ءالى دە كوك بازاردان تابۋعا بولادى، ال نەو-كوشپەلى باعىتتاعى مەيرامحانالار ولاردى زاماناۋي ۇلگىدە ۇسىنادى.
Eater الماتىداعى شاي ءىشۋ مادەنيەتىنە دە ەرەكشە توقتالعان. باسىلىمنىڭ جازۋىنشا، قالا داستارحانىندا شاينەك ءاردايىم توردە تۇرادى. سونداي-اق، تۋريستەرگە ءسابىز قوسىلعان پالاۋ مەن قازىنىڭ ءدامىن تاتىپ كورۋگە كەڭەس بەرەدى. بۇعان قوسا، جەرگىلىكتى تاعامداردى ۇسىناتىن مەيرامحانالار جەلىسىنىڭ كوپتىگى ساياحاتشىلاردىڭ قازاق اسحاناسىمەن وڭاي تانىسۋىنا مۇمكىندىك بەرەتىنى ايتىلعان.
