الماتى قالاسىنداعى ءال-فارابي اتىنداعى №145 مەكتەپ-گيمنازيادا «عالىممەن ساباق: ۋنيۆەرسيتەت عىلىمى – مەكتەپ وقۋشىسىنا» عىلىمي-ادىستەمەلىك ءبىلىم بەرۋ جوباسى ءوتتى. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ فيلولوگيا فاكۋلتەتى مەن مەكتەپ بىرلەسىپ ۇيىمداستىرعان باستاما جوعارى جانە ورتا ءبىلىم اراسىنداعى بايلانىستى نىعايتىپ، وقۋشىلاردى عىلىمي ىزدەنىسكە باۋلۋعا ارنالدى.
جوبا اياسىندا ۋنيۆەرسيتەتتىڭ بەس عالىمى قازاق ءتىلى مەن ادەبيەتى بويىنشا تاقىرىپتىق ساباقتار وتكىزدى.
رايەۆا گۋلزات ماگاۋوۆنا 5-سىنىپتا «فونەتيكا: ءتىل دىبىستارى جانە ۇندەستىك زاڭدىلىقتارى»، يلياسوۆا ناعيما ابزەلبەك قىزى 8-سىنىپتا «مورفولوگيا مەن سينتاكسيس: ءسوز تۇلعاسى مەن سويلەم قۇرىلىمىنىڭ بايلانىسى» تاقىرىپتارىن ءتۇسىندىردى. 
يمانعالي وركەن 10-سىنىپ وقۋشىلارىمەن مۇحتار اۋەزوۆتىڭ «اباي جولى» رومان-ەپوپەياسىنا قاتىستى «ءداۋىر، كەيىپكەر جانە كوركەمدىك تانىم» تاقىرىبىندا جۇمىس جۇرگىزدى.
ساتەميروۆا داريحا امانتايەۆنا 8-سىنىپ وقۋشىلارىنا «جىراۋلار پوەزياسى: ۇلتتىق رۋح، تاريحي جاد جانە كوركەم ءسوز» تاقىرىبىندا ساباق بەردى.
وسپانوۆ ەدىلباي تولەباي ۇلى 11-سىنىپقا «ەسسە جازىپ ۇيرەنەيىك: تەزيس، دالەل جانە قورىتىندى» تاقىرىبىندا پراكتيكالىق ساباق وتكىزىپ، جازبا جۇمىستىڭ قۇرىلىمى مەن نەگىزگى تالاپتارىن ءتۇسىندىردى.
فيلولوگيا فاكۋلتەتىنىڭ دەكانى بوتاكوز تلەۋبەكوۆا: «ۋنيۆەرسيتەتتە جيناقتالعان عىلىمي ءبىلىم مەكتەپ وقۋشىسىنا تۇسىنىكتى ءارى قىزىقتى تۇردە جەتۋى كەرەك. بۇل جوبا ارقىلى وقۋشىنىڭ سۇراق قويۋىنا، ءماتىندى تالداۋىنا جانە ءوز ويىن دالەلدەۋىنە مۇمكىندىك بەرۋدى كوزدەيمىز».
مەكتەپ ديرەكتورى نۋرادينوۆ نۇرعالي مۇحيت ۇلى: «عالىمنىڭ مەكتەپكە كەلىپ ساباق بەرۋى بالالاردىڭ پانگە كوزقاراسىن كەڭەيتەدى. مۇعالىمدەرىمىز ءۇشىن دە بۇل — عىلىمي ورتا وكىلدەرىمەن تاجىريبە الماسىپ، ساباق مازمۇنىن بايىتۋعا مۇمكىندىك».
ءىس-شاراعا فيلولوگيا عىلىمدارىنىڭ كانديداتى، دوسەنت، فيلولوگيا فاكۋلتەتىنىڭ دەكانى تلەۋبەكوۆا بوتاكوز تۋرگامبايەۆنا؛ فيلولوگيا عىلىمدارىنىڭ كانديداتى، اعا وقىتۋشى رايەۆا گۋلزات ماگاۋوۆنا؛ فيلولوگيا عىلىمدارىنىڭ دوكتورى، اعا وقىتۋشى يلياسوۆا ناعيما ابزەلبەك قىزى؛ PhD، اعا وقىتۋشى يمانعالي وركەن؛ فيلولوگيا عىلىمدارىنىڭ كانديداتى، دوسەنت، اعا وقىتۋشى ساتەميروۆا داريحا امانتايەۆنا؛ فيلولوگيا عىلىمدارىنىڭ كانديداتى، الەم تىلدەرى فاكۋلتەتىنىڭ دەكانى وسپانوۆ ەدىلباي تولەباي ۇلى؛ PhD، كافەدرا مەڭگەرۋشىسى كۋتتىبايەۆ شوكانحان دۇيسەنحانوۆيچ؛ فيلولوگيا عىلىمدارىنىڭ كانديداتى، كافەدرا مەڭگەرۋشىسى قاسەن ەرلان سلامبەك ۇلى قاتىستى. قاتىسۋشىلار قاتارىندا جوبا اۆتورلارى — PhD، مانساپ ورتالىعىنىڭ باسشىسى جەتىباي راقىمبەردى قاجىعالي ۇلى جانە PhD، كاسىبي باعدار جانە مانساپتى دامىتۋ دەپارتامەنتىنىڭ ديرەكتورى نايمانبايەۆ الماس ءابدىماناپ ۇلى بولدى.
ساباقتاردان كەيىن «عالىمعا سۇراق» فورماتىندا اشىق پىكىر الماسۋ ءوتتى. ۋنيۆەرسيتەت عالىمدارى مەن مەكتەپ مۇعالىمدەرى زاماناۋي وقىتۋ ادىستەرىن، فۋنكسيونالدىق ساۋاتتىلىقتى ارتتىرۋ جولدارىن جانە ءتىل مەن ادەبيەتتى وقىتۋدىڭ ءتيىمدى تاسىلدەرىن تالقىلادى.
