Almatyda «Taza Qazaqstan» respýblıkalyq baǵdarlamasy aıasynda GREEN UP ekologıalyq jobasy bastaldy, - dep habarlaıdy alnews.
Bastamanyń tanystyrylymy 31 tamyzda qaladaǵy №224 mektepte ótti. Joba ECO Network qatysýymen, qalanyń Ekologıa jáne qorshaǵan orta basqarmasy men Eco Almaty qoldaýymen júzege asyrylyp otyr.
GREEN UP jobasy oqýshylar men olardyń otbasylarynda qaldyqty bólek jınaý, jaýapty tutyný jáne tabıǵı resýrstarǵa uqypty qaraý sekildi ekologıalyq ádetterdi qalyptastyrýǵa baǵyttalǵan.
Alǵashqy pılottyq joba Bostandyq aýdanynda qolǵa alynǵan. Green APP Almaty baǵdarlamasy aıasynda aýdandaǵy balabaqshalar, mektepter men kolejderdi biriktirý josparlanǵan. Markov kóshesi, 44 mekenjaıyndaǵy jáne Satbayev University-degi Eko-habtar, sondaı-aq econetwork.me sıfrlyq platformasy bastamanyń negizine aınaldy.
Qatysýshylar qaıtalama shıkizatty úıde jınap, Eko-habtarǵa tapsyra alady. Nátıje mobıldi qosymshada tirkelip, bilim berý uıymdarynyń jalpy reıtıńinde eskeriledi. Sondaı-aq, ekologıalyq aksıalar men eriktilik is-sharalarǵa qatysqany úshin upaı jınaýǵa bolady.
№224 mekteptiń dırektory Raıza Ahmetova ekologıalyq ádetterdi erte jastan qalyptastyrýdyń mańyzyn atap ótti.
«Bizdiń maqsatymyz – oqýshylardyń ekologıalyq mádenıetin qalyptastyryp, qorshaǵan ortaǵa jaýapkershilikpen qaraýdy kúndelikti ádetke aınaldyrý. Balanyń tabıǵatty qorǵaý qajettigin bilip qana qoımaı, óziniń is-áreketi arqyly ony saqtaýǵa naqty úles qosa alatynyn túsinýi mańyzdy», – dedi Raıza Ahmetova.
Tanystyrylym barysynda oqýshylarǵa qaldyqty qalaı durys suryptaý kerektigi jáne qandaı materıaldardyń qaıta óńdeýge qabyldanatyny kórsetildi. Oqýshylar makýlatýra men plasık qaldyqtaryn da ákelip, qaıta óńdeýge tapsyrdy.
Joba avtory Evgenıı Muhamedjanov ekologıalyq ádet tájirıbe jáne búkil otbasynyń atsalysýy arqyly tıimdi qalyptasatynyn jetkizdi.
«Ekologıalyq mádenıet adamnyń kúndelikti qarapaıym áreketinen bastalady. Eger bala úıde qaldyqty suryptap, olardy qaıta óńdeýge tapsyrsa, ýaqyt óte kele bul iske búkil otbasy qosylady. Bizdiń mindetimiz – ekologıalyq jaýapty áreketti túsinikti, qoljetimdi ári qyzyqty etý», – dedi Evgenıı Muhamedjanov.
Aldaǵy ýaqytta qatysýshylar ekologıalyq klýbtar quryp, bastamalaryn usynyp, qala tabıǵatyn qorǵaý aksıalaryna qatysa alady. Sondaı-aq, mektep oqýshylaryna, kolej stýdentterine, ata-analar men bilim berý uıymdarynyń qyzmetkerlerine arnalǵan eriktilik baǵdarlama qarastyrylǵan.
Jobada yntalandyrý tetigi de qarastyrylǵan. Belsendi qatysýshylar men bilim berý uıymdary jáne qaıtalama shıkizattyń belgili bir túrlerin jınaǵany úshin marapattalady. Bolashaqta bul úlgini Almatynyń basqa aýdandaryna da engizý josparlanyp otyr.
GREEN UP ekologıalyq aǵartýdy, sıfrlyq quraldar men naqty is-áreketterdi ushtastyra otyryp, qaldyqtarǵa jaýapkershilikpen qaraýdy kúndelikti ómirdiń bir bóligine aınaldyrýdy kózdeıdi.
