Almatyda qala ákimdiginiń qoldaýymen uıymdastyrylǵan Almaty Summer Fest festıvaliniń alǵashqy maýsymy aıaqtaldy, - dep habarlaıdy alnews.
Jaz boıy Alataý aýdanyndaǵy «Alataý» dástúrli óner teatrynyń alańynda ashyq aspan astynda 13 konsert ótti.
Baǵdarlamanyń bir bóligi memlekettik merekeler men kórnekti mádenıet qaıratkerleriniń shyǵarmashylyǵyna arnaldy. Joba aıasynda Dombyra kúnine, Astana kúnine, Abaı kúnine arnalǵan is-sharalar, sondaı-aq Shámshi Qaldaıaqovtyń týǵan kúnine oraı mýzykalyq kesh uıymdastyryldy.
Sahnada Dos-Muqasan, Roza Rymbaeva, Maqpal Júnisova, Mádına Sádýaqasova, Qaırat Nurtas, MuzArt, Janar Duǵalova, Mıras Júginisov, Kalifarniya, Turar, Alem, Bayansulu, Sadraddın, Erke Esmahan, Nurjan Kermenbaev jáne basqa da ónerpazdar óner kórsetti.
Festıvál aıasynda ekologıa taqyrybyna da erekshe mán berildi. Konsert barysynda «Taza Qazaqstan» aksıasynyń qundylyqtary nasıhattalyp, is-sharalar aıaqtalǵan soń kórermender aýmaq tazalyǵyn saqtaýǵa shaqyryldy.
Jaz boıy jobaǵa 300-den astam ónerpaz qatysyp, 1 myńnan astam án shyrqaldy. Konsertterdi 250 myńnan astam kórermen tamashalady, al festıvál týraly áleýmettik jelilerde jarıalanǵan materıaldardyń jalpy qaralymy 50 mıllıonnan asty.
Almaty Summer Fest mádenı is-sharalardyń qoljetimdiligin arttyrýǵa jáne qala turǵyndary men qonaqtarynyń jazǵy demalysyn mazmundy ótkizýge baǵyttaldy.
