Jańa Konstıtýsıa jobasyndaǵy sıfrlyq ortany retteýge qatysty usynystar Almaty oblysynyń turǵyndary úshin aıryqsha mańyzdy. Bul týraly oblys máslıhatynyń tóraǵasy Qýat Baıǵojaev Konstıtýsıalyq komısıanyń 11-shi otyrysynda málimdedi.
Onyń aıtýynsha, Almaty oblysy – halyq tyǵyz qonystanǵan, sıfrlyq servıster belsendi iske qosylǵan óńirlerdiń biri. Sondyqtan, ulttyq ekonomıkanyń ósý draıverine aınalýy tıis «Alatau City» jobasy dál osy óńirde qolǵa alynyp jatyr.
«Búginde azamattardyń qaýipsizdigi máselesi qalyptasqan uǵymdar sheńberinen shyǵyp, sıfrlyq tehnologıalar deńgeıine deıin kóterilgenin kórip otyrmyz. Sıfrlyq tehnologıa qoǵamnyń barlyq salasyna aralasyp, kúndelikti adam ómiriniń ajyramas bóligine aınaldy. Al jańa Konstıtýsıa jobasynda azamattardyń sıfrlyq saladaǵy quqyǵyn qorǵaý mindeti qarastyrylǵany – búgingi kún talaby ekeni daýsyz», – dedi Qýat Baıǵojaev.
Óz sózinde spıker azamattardyń ózara hat-habar almasý qaýipsizdigi, elektrondy komýnıkasıa, derbes derekterdiń qorǵalýy syndy máselelerdiń qamtylýy jeke ómir qupıasynyń kepildigin nyǵaıtyp, sıfrlyq servısterge degen senimdi kúsheıtetinin jetkizdi.
«Olardyń konstıtýsıalyq deńgeıde bekitilýi sıfrlyq qaýipsizdik salasyndaǵy zańnamany ári qaraı damytý tájirıbesine berik negiz bola alady. Usynylyp otyrǵan ózgerister azamattar úshin naqty máselelerden kórinis tabýy qarapaıym azamattardyń kúndelikti ómirde alańsyz bolyp, qoǵamnyń memlekettik ınstıtýttarǵa degen seniminiń kúsheıtýge áser etedi», – dedi ol.
Sóz sońynda Komısıa múshesi Konstıtýsıa jobasy jetkilikti pysyqtalǵanyn jáne ony búkilhalyqtyq referendýmǵa shyǵarýǵa bolatynyn aıtty.
