Reseı men Soltústik Koreıa qol qoıǵan ózara qorǵanys sharty eki eldiń soǵys bolǵan jaǵdaıda bir-birine dereý áskerı kómek kórsetýin talap etedi. Sarapshylardyń boljaýynsha Soltústik Koreıa bul shartqa súıene otyryp, burynǵydan da batyl is-qımylǵa táýekel etýi múmkin. Al jaǵdaıdyń bulaı damýy Shyǵys Azıada Qyrǵı-qabaq soǵysy kezeńindegi sharttyń qaıta túzilýine ıtermeleýi múmkin.
Pýtın men Kım qol qoıǵan jan-jaqty seriktestik týraly shart qajetti resýrstardy ózara bólisý, ózara jedel áskerı kómek kórsetý talaptaryn qamtıdy. Uzaq ýaqyt oqshaýlanǵan Soltústik Koreıa úshin bul úlken qoldaýmen teń. Iadrolyq jáne zymyran synaqtary arqyly Ońtústik Koreıa men Japonıany udaıy alańdatyp kele jatqan Pıońáń aldaǵy ýaqytta bundaı áreketterin tipti de jıilete túsýi boljanýda.
Eger Soltústik Koreıanyń arandatý áreketteri belsendi jalǵasaa bul Amerıka Qurama Shtattary men onyń aımaqtaǵy odaqtastary bolǵan Japonıa jáne Ońtsútik Koreıa arasyndaǵy birlesken áreketterdi arttyrady. Iaǵnı, Japonıa, Ońtústik Koreıa jáne Amerıka Qurama Shtattary endi Reseı men Soltústik Koreıanyń qorǵanys shartynyń qaýpine qarsy turý úshin qosymsha áskerı kúsh toptaıdy nemese áskerı nysandaryn kóbeıtýi bek múmkin. Al bul aımaq Qytaıǵa jaqyn bolǵandyqtan Beıjiń udaıy onyń qysymyna tap bolary anyq. Osylaısha Koreı túbegindegi shıelenis barǵan saıyn ýshyǵa túsýi múmkin. Qazir sarapshylar aımaqtaǵy mundaı jaǵdaıǵa Qytaı aralasa ma, joq pa degen máselege jaýap izdeýde.
Qytaı ózin álemdi jaýlasqan lagerlerge bólýge qarsy turatyn beıbit el retinde kórsetýge tyrysyp keledi. Kerisinshe, Beıjiń Amerıka Qurama Shtattaryn óz odaqtastaryn toptap, álemdi jańa qyrǵı-qabaq soǵysqa ıtermeledi dep aıyptaıdy. Al Reseı men Soltústik Koreıa Qytaıdyń eń jaqyn strategıalyq seriktesteri. Olar arasyndaǵy kelisim Beıjiń úshin odan da kóp qıyndyqtar týǵyzady dep boljaýǵa negiz bar.
Tarata aıtar bolsaq, álgindeı shart Qytaı, Reseı jáne Soltústik Koreıa arasyndaǵy úshjaqty yqpaldy kúsheıtedi. Beıjiń bolsa óziniń strategıalyq qarsylastaryna qandaı da bir eldermen túbegeıli odaq qurǵysy kelmeıdi. Iaǵnı lagerlerge jiktelý Beıjiń aýlaq bolýdy qalaıtyn nárse. Sondyqtan aldaǵy ýaqytta Qytaı úshin eki seriktesiniń is-qımyldaryna udaıy qadaǵalap otyrýǵa týra keledi.
