Almatyda Asylbek İzbaırovtyń jańa kitaby tanystyryldy

11 tamyzda Almatydaǵy Qazaqstan Respýblıkasynyń Ulttyq kitaphanasynda tarıh ǵylymdarynyń doktory, «Nur-Múbarak» ýnıversıtetiniń profesory, Geosaıası zertteýler ınstıtýtynyń dırektory Asylbek İzbaırovtyń «Zaıyrly memleket, postsekýlárly qoǵam jáne qazaq Ádebi – Qazaqstannyń jańa ulttyq biregeıliginiń negizi retinde» atty kitabynyń tanystyrylymy ótti.

İs-shara barysynda ulttyq biregeılik, qoǵamdyq shoǵyrlaný, rýhanı egemendik, zaıyrlylyq jáne qoǵamdyq ádep máseleleri talqylandy. Kezdesýge ǵylymı jáne sarapshylyq qoǵamdastyq ókilderi, qoǵam qaıratkerleri, jýrnalıser, oqytýshylar, stýdentter jáne qoǵamdyq damý máselelerine qyzyǵýshylyq tanytqan azamattar qatysty.

İs-sharany «Delovaıa nedelá» gazetiniń bas redaktory Mahambet Áýezov ashty.

Kitapty avtor Asylbek İzbaırov tanystyryp, eńbektiń negizgi baǵyttary týraly aıtyp berdi. Zertteýde zaıyrly jáne dinı qundylyqtardyń araqatynasy, postsekýlárly qoǵam tujyrymdamasy jáne ulttyq biregeılikti qalyptastyrý máseleleri qarastyrylǵan.

Avtor sondaı-aq qazaq Ádebi uǵymynyń qazirgi qoǵamdaǵy ornyna toqtaldy. Kitapta Ádep ulttyq mádenıettiń quramdas bóligi jáne qoǵamdyq qarym-qatynastardy retteıtin mádenı-etıkalyq qundylyq retinde qarastyrylady.

Zertteýde qoǵamdyq kelisim, ulttyq sana, rýhanı qundylyqtar, mádenı sabaqtastyq jáne zaıyrly memleket qaǵıdattary da qamtylǵan. Avtor bul máselelerdi Qazaqstandaǵy ulttyq biregeıliktiń qalyptasý úderisimen baılanystyrady.

Tanystyrylym barysynda kitaptyń Qazaqstan Respýblıkasynyń Ulttyq kitaphanasynyń qoryna tapsyrylý rásimi ótti.

İs-sharada «Álternatıv» ózekti zertteýler ortalyǵynyń dırektory Andreı Chebotarev jáne «Lıbertı» qoǵamdyq qorynyń dırektory Ǵalym Agelýev sóz sóılep, kitapta kóterilgen taqyryptarǵa qatysty pikirlerin bildirdi.

Kezdesýdiń sońynda suraq-jaýap bólimi ótip, qatysýshylar ulttyq biregeılik, zaıyrly qoǵam, rýhanı qundylyqtar jáne qoǵamdyq ádep máseleleri boıynsha pikir almasty.

Tanystyrylym sońynda qatysýshylar estelik sýretke túsip, avtordan kitapqa qoltańba aldy.