Almatyda LRT birinshi jelisiniń qurylysyna daıyndyq jumystary jalǵasyp jatyr, - dep habarlaıdy alnews.
Qazirgi kezeńde negizgi jumystar B. Momyshuly jáne Tóle bı kóshelerinde júrgizilýde. Munda jeli ótetin aýmaqty daıyndaý jáne qurylys aımaǵyna kiretin ınjenerlik komýnıkasıalardy qaıta ornalastyrý jumystary qolǵa alynǵan.
Joba aıasynda barlyǵy 375 ınjenerlik jelini, onyń ishinde jylý, baılanys, sýmen jabdyqtaý jáne káriz, nóser kárizi, gazben jáne elektrmen jabdyqtaý jelilerin qaıta ornalastyrý kózdelgen.
B. Momyshuly kóshesinde, onyń ishinde bolashaq depo ornalasatyn aýmaqta 39 ınjenerlik komýnıkasıa qaıta ornalastyrylady. Qazir onyń 4-eýi boıynsha jumys aıaqtalǵan. Tóle bı kóshesinde 269 jelini qaıta ornalastyrý qajet bolsa, onyń 34-i boıynsha jumystar aıaqtaldy. Abylaı han dańǵylynda taǵy 67 ınjenerlik jelini qaıta ornalastyrý kózdelgen.
Sonymen qatar eski tramvaı relsteri alynypp, joldyń ortańǵy eki jolaǵynda topyraq qazý jumystary júrgizildi. Jumysty uıymdastyrýdyń negizgi qaǵıdaty – shetki jolaqtarda kólik qozǵalysyn saqtaý. Injenerlik jelilerdi qaıta ornalastyrý qajet bolǵan jaǵdaıda jol qozǵalysy qarsy baǵyttaǵy bir jolaq arqyly uıymdastyrylady. Mundaı jumystarǵa baılanysty keıbir ýchaskelerdegi shekteýler, ádette, bir-eki kúnnen aspaıdy.
Injenerlik jelilerdi qaıta ornalastyrý – LRT jelisi ótetin aýmaqty daıyndaýdyń qajetti kezeńi. Keıbir ýchaskeler bosatylǵan saıyn jeli qurylymdaryn ornatý, shpal men rels tóseý jáne basqa da jumystar bastalady.
Qurylys-montaj jumystary qys mezgilinde de jalǵasady. Temperatýra tómendegen kezde topyraqty qorǵaý, qysqy jaǵdaıda beton quıý, qurylymdardy jylylaý jáne betonnyń qajetti beriktikke jetýin qamtamasyz etýge baǵyttalǵan arnaıy tehnologıalyq sharalar qoldanylady.
Jobalyq sheshimge sáıkes, LRT birinshi jelisiniń birinshi kezeńi Alataý aýdanyndaǵy ındýstrıalyq aımaqta, Móńke bı jáne B. Momyshuly kósheleriniń mańynda ornalasatyn depodan bastalady. Odan ári jeli B. Momyshuly kóshesimen Tóle bıge, Tóle bı kóshesi arqyly shyǵys baǵytta Abylaı han dańǵylyna, odan ári «Almaty-2» temirjol vokzalyna deıin jalǵasady. Sońǵy stansıa retinde «Raıymbek batyr» kólik-aýysý toraby qarastyrylǵan.
LRT jelisiniń birinshi kezeńi tolyǵymen jerústi baǵytta bolady. Joba aıasynda estakada salý josparlanbaǵan, al qoldanystaǵy kópir qurylymdaryn kúsheıtý qarastyrylǵan. LRT iske qosylǵannan keıin B. Momyshuly jáne Tóle bı kóshelerindegi joldyń ortańǵy eki jolaǵy tek jeńil relsti poıyzdardyń qozǵalysyna beriledi. Olar jıektastar arqyly oqshaýlanady. Bul qoǵamdyq kólik qozǵalysyna basymdyq berip, onyń jyldamdyǵy men turaqtylyǵyn arttyrýǵa jáne jol-kólik oqıǵalarynyń qaýpin azaıtýǵa múmkindik beredi.
LRT poıyzdarynyń eń joǵary tehnıkalyq jyldamdyǵy 65-70 km/saǵ bolady. Alaıda aıaldamalar arasyndaǵy ortasha qashyqtyq shamamen 700 metr bolǵandyqtan, poıyzdardyń ortasha qozǵalys jyldamdyǵy 30-35 km/saǵ deńgeıinde bolady. Arnaıy bólingen jol qoǵamdyq kóliktiń qaýipsiz ári turaqty qozǵalysyn qamtamasyz etedi.
LRT birinshi jelisin 2027 jyldyń sońynda iske qosý josparlanyp otyr. Bul merzim qajetti kólemdegi jyljymaly quramdy daıyndaý jáne jetkizý kestesine baılanysty ózgerýi múmkin.
