QHP Ortalyq keńsesinde jańa Konstıtýsıa jobasy boıynsha pikirtalas ótti. Oǵan partıa belsendileri qatysty, - dep habarlaıdy alnews.
İs-shara partıa mektebiniń kópshilik aldynda pikirtalastyrý daǵdysyn jetildirý alańynda uıymdastyryldy. Munda partıa músheleri faktimen jumys isteý, dálelmen sóıleý, baıandamanyń strategıasy men rıtorıkasyn qalyptastyrý, sóz sóıleý logıkasyn baqylaý jáne belgilengen ýaqyt reglamentin saqtaý mashyǵyn meńgeredi. Qatysýshylardyń jasyna shek qoıylmaıdy, olardyń mamandyǵy men qyzmet kórsetý salasy ártúrli bolady.
Joba elimizdiń barlyq óńirinde QHP fılıaldarynyń bazasynda júzege asyrylýda. QHP Ortalyq keńsesinde ótken pikirtalas osyǵan uqsas pikirtalas serıasynyń biri boldy.
– Ókinishke qaraı, keıde belgili bir salanyń beıindi mamandary tıisti bilim men daǵdynyń ıesi bola tura bastamalaryn naqty tujyrymdap, ustanymdaryn dáleldi túrde qorǵaı almaı jatady, – dedi is-sharany uıymdastyrýshylardyń biri, Májilis depýtaty, QHP «JAS ORTA» Jastar qanatynyń basshysy Islam Suńqar. – Biraq olarǵa adamdardyń, QHP-nyń, salanyń, bıznestiń múddesin jáne t.b. qorǵaý qajet. Biz polemıkalyq sheberlikti shyńdaý úshin osyndaı alań qurdyq.
Pikirsaıystyń sharty boıynsha sóz sóıleýge aldyn ala daıyndalmaıdy. Spıkerler baıandamalarynyń taqyryby men qorǵaýǵa tıis ustanymyn sol jerde biledi. Óz kezeginde qazylar alqasynyń músheleri sóz sóıleý barysynda baıandamashy qanshalyqty senimdi sóılep, tyńdaýshylardy dáleli men dáıegine ılandyra alǵanyna baǵa beredi.
Pikirtalas barysynda qoǵamdaǵy eń ózekti máseleler talqylanady. Osy joly QR jańa Konstıtýsıasynyń jobasy aıasynda «Konstıtýsıanyń preambýlasy – bolashaqtyń kompasy» jáne «Adamǵa baǵdarlanǵan memleket» degen taqyryp tańdaldy. Pikirtalasqa qatysýshy, QHP belsendisi, jobalaý kompanıasynyń basshysy Naılá Appasova bir palataly Parlament qurý bastamasyna qoldaý bildire otyryp, bul másele osyǵan deıin júzege asyrylǵan reformalar tizbeginiń zańdy jalǵasy ekenin atap ótti.
– Saıası júıe reformalanyp, transformasıa júrip jatyr, – dedi N.Appasova. – Bul bir palataly Parlamentke óz isiniń kásibı jáne tájirıbeli mamandaryn biriktirip, olarǵa sheshim qabyldaý jaýapkershiligin júkteıdi
Qatysýshylardyń biri, saıasattanýshy, «Eýrazıalyq monıtorıń» analıtıkalyq zertteý ortalyǵynyń dırektory Álibek Tájibaev «Kúshti tulǵalardyń ornyna kúshti ınstıtýttar» degen taqyrypta baıandama jasap, qazirgi Konstıtýsıalyq reforma basqarý júıesin kúsheıtýdi kózdeıtinin dáleldedi.
– Bul úshin jańa Konstıtýsıada barlyq jaǵdaı jasalǵan, – dedi saıasattanýshy.
Qazaqstan Halyq partıasy bul jumysty odan ári jalǵastyrady.
