Búgin Astana qalasynda «SARAP» eksperttik klýbynyń «Ózgerister kezeńindegi otbasy: áleýmettik transformasıaǵa Konstıtýsıa turǵysynan jaýap» atty otyrysy ótti. İs-sharany Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýty uıymdastyrdy, - dep habarlaıdy alnews.
Talqyǵa QR Prezıdenti janyndaǵy Áıelder isteri jáne otbasylyq-demografıalyq saıasat jónindegi Ulttyq komısıanyń músheleri, akademıalyq qaýymdastyq ókilderi men sarapshylar, sondaı-aq úkimettik emes uıymdar men Astana qalasyndaǵy Otbasyn qoldaý ortalyǵynyń ókilderi qatysty.
Jıyn qatysýshylary jańa Konstıtýsıa jobasyna, onyń ishinde neke, otbasy, ana, áke jáne bala máselelerin retteıtin 30-bapqa qatysty oıyn ortaǵa saldy. Sarapshylar taqyrypty Qazaqstan qoǵamyndaǵy áleýmettik ózgerister men otbasy jáne týystyq qatynastardyń transformasıasyn kórsetetin áleýmettanýlyq zertteýler negizinde talqylady.
İs-sharaǵa Qazaqstandyq qoǵamdyq damý ınstıtýtynyń basqarma tóraǵasy Juldyzaı Ysqaqova moderator boldy. Ol jańa Konstıtýsıa jobasyna otbasy jáne neke qarym-qatynastaryn retteýge baǵyttalǵan jańa normany engizý neke ınstıtýtynyń quqyqtyq mártebesin anyqtap, áleýmettik ózgerister jaǵdaıyndaǵy Qazaqstan otbasyna jańa qundylyq baǵdaryn belgileýge septigin tıgizetinin atap ótti.
QQDI Otbasy jáne genderlik saıasat salasyndaǵy zertteýler ortalyǵynyń basshysy Aqnur Imanqul Qazaqstan otbasylarynyń áleýmettanýlyq portreti týraly baıandama jasady.
«Qazaqstannyń otbasy ınstıtýty daǵdarysta emes, kerisinshe, áleýmettik ózgeris jaǵdaılaryna beıimdelip keledi. Bul qundylyq baǵdarlaryn, genderlik sezimtaldyqty jáne áleýmettik-ekonomıkalyq qoldaý tetikterin ushtastyratyn ıkemdi, maqsatty ári teńgerimdi otbasy saıasatyn talap etedi», – dedi sarapshy.
Áleýmettaný ǵylymdarynyń doktory, QSZI bas ǵylymı qyzmetkeri Aıgúl Zabırova qazirgi ýaqytta otbasy ınstıtýty áleýmettik úderisterdiń yqpalymen kúrdelene túskenin atap ótti.
«Buryn qoǵamdyq damýdyń negizgi baǵdarlary ýrbanızasıa, ındýstrıalandyrý, jappaı bilim berý jáne demokratıalandyrý úderisterimen aıqyndalsa, búginde otbasynyń transformasıa baǵyttaryn jáne nekeniń quqyqtyq anyqtamasyn qaıta paıymdaý qajettigi týyndap otyr. Osy turǵyda jańa Konstıtýsıa jobasynyń 30-babynda nekeniń er men áıel arasyndaǵy erikti odaq retinde bekitilýi quqyqtyq aıqyndyqty qamtamasyz etip, qazirgi qoǵamdyq suranystarǵa saı keledi», – dedi sarapshy.
Ulttyq ekspert – demograf Aıaýlym Saǵynbaeva balalardyń ata-anasynyń nekede bolýy mańyzdy ekenin ári bul balalardyń qaýipsizdigin qamtamasyz etetinin atap ótti. Sarapshynyń pikirinshe, otbasy týraly normalar er men áıelge ǵana emes, eń bastysy, balalardyń quqyqtary men ál-aýqatyna baǵyttalýǵa tıis.
Sondaı-aq is-shara barysynda otbasy ınstıtýtynyń transformasıasy, memlekettiń otbasy saıasatyn qalyptastyrý men iske asyrýdaǵy róli jáne konstıtýsıalyq retteý men áleýmettik praktıkalardyń araqatynasyna qatysty máseleler qozǵaldy. Qatysýshylar áleýmettik mańyzy bar ınstıtýttarǵa qatysty konstıtýsıalyq normalardy taldaǵanda, empırıkalyq derekterdi paıdalaný mańyzdy ekenin de erekshe atap ótti.
