Japonıanyń Aıtı prefektýrasy men Nagoıa qalasynda ótken HH Azıa oıyndarynda el namysyn qorǵaǵan Qazaq sport jáne týrızm akademıasynyń stýdent-sportshylaryna Akademıada qurmet kórsetildi, - dep habarlaıdy alnews.
19 qyrkúıek pen 4 qazan aralyǵynda ótken HH Azıa oıyndaryna Azıanyń 45 eli men aımaǵynan sportshylar qatysyp, qurlyqtyń eń iri sport dodasynda baq synady.
El namysyn halyqaralyq arenada qorǵap júrgen sportshylarǵa turaqty qoldaý kórsetý – Qazaq sport jáne týrızm akademıasynyń Prezıdenti Qaırat Qaırýllauly Zakıránovtyń basty nazaryndaǵy baǵyttardyń biri.
Azıada-2026 dodasynda QazSTA stýdentteri joǵary nátıje kórsetip, Qazaqstan qorjynyna 2 altyn, 1 kúmis jáne 4 qola medal qosty.
Solardyń qatarynda taekvondoshy Tamırlan Tileýles pen semserlesýshi Kırıll Prohodov Azıa oıyndarynyń chempıony atandy. Tamırlan Tileýles taekvondodan tarıhı jeńiske jetse, Kırıll Prohodov semserlesýden Qazaqstan quramasynyń sapynda altyn medal ıelendi.
Al Alıjan Ablagatov ýshý-sandadan Azıa oıyndarynyń qola júldegeri atandy. Onyń bul medali Qazaqstan úshin atalǵan sport túrinen Azıa oıyndaryndaǵy alǵashqy júlde boldy.
Akademıa Prezıdenti Qaırat Qaırýllauly Zakıránov stýdent-sportshylardyń jetistigin joǵary baǵalap, Tamırlan Tileýles pen Alıjan Ablagatovqa rektor grantyn tabystady. Buǵan deıin aqyly bólimde bilim alyp kelgen qos sportshy endi oqýyn tegin jalǵastyrady.
Bul sheshim – QazSTA-nyń sporttaǵy jetistikti bilimmen ushtastyrýǵa, talantty jastardy qoldaýǵa jáne olardyń kásibı damýyna jaǵdaı jasaýǵa baǵyttalǵan naqty qadamy.
Sharanyń erekshe sátteriniń biri – qazaq boksynyń dańqty ókili, 1980 jylǵy Máskeý Olımpıadasynyń kúmis júldegeri Serik Qonaqbaevtyń Akademıaǵa arnaıy kelýi boldy.
Serik Qonaqbaevqa Qazaq sport jáne týrızm akademıasynyń Qurmetti profesory ataǵy berildi. Sondaı-aq oǵan Qazaqstan Ulttyq Olımpıada komıtetiniń joǵary ordeni Gennadıı Golovkınniń usynysymen tabystaldy.
Qazaq boksynyń ańyz tulǵasynyń Akademıaǵa kelýi jas sportshylar úshin úlken motıvasıa boldy. Sanaly ǵumyryn sportqa arnaǵan, talaı bıikti baǵyndyrǵan Serik Qonaqbaevtyń ónegeli joly – búgingi stýdentter úshin tabandylyq pen elge qyzmet etýdiń jarqyn úlgisi.
Saltanatty shara barysynda jıý-jıtsýdan Azıa oıyndarynyń qola júldegeri Jibek Qulymbetovaǵa da alǵys hat tabystaldy.
QazSTA úshin chempıondardy ulyqtaý – tek jeńisti atap ótý emes, jas urpaqqa úlgi kórsetý, olardyń úlken sporttaǵy jolyna qoldaý bildirý. Búgingi jeńister – stýdent-sportshylardyń qajyrly eńbeginiń nátıjesi bolsa, Akademıa tarapynan kórsetilgen qoldaý olardyń aldaǵy bıikterine berilgen senimniń belgisi.
