Almatynyń Túrksib aýdanyndaǵy «Jas Qanat» shaǵynaýdanynda jańa qalalyq kitaphana jumysyn bastady. Bul týraly Almaty qalasy Mádenıet basqarmasynyń baspasóz qyzmeti habarlady.
Jańa kitaphana Memleket basshysy Qasym-Jomart Toqaevtyń qoǵamda kitap oqý mádenıetin damytýǵa jáne zıatkerlik áleýetti arttyrýǵa baǵyttalǵan «Oqıtyn ult» bastamasy aıasynda ashyldy.
Jańa qalalyq kitaphana – turǵyndardyń kitap oqýyna, bilim alýyna jáne bos ýaqytyn mazmundy ótkizýine arnalǵan zamanaýı mádenı-aǵartýshylyq keńistik. Kitaphananyń jalpy aýdany 340 sharshy metr, al kitap qory 10 myńnan astam basylymdy qamtıdy.
Munda oqyrmandardyń jas erekshelikteri men qyzyǵýshylyqtary eskerilip, qazaq, orys jáne shet tilderindegi kórkem ádebıet, balalar ádebıeti, tanymdyq jáne ǵylymı-kópshilik basylymdar, sondaı-aq túrli janrdaǵy zamanaýı kitaptar usynylǵan.
Kelýshiler úshin jaıly oqý zaly, kitaptardy úıge alyp oqýǵa múmkindik beretin abonement bólimi, balalarǵa arnalǵan aımaqtar, kompúterlermen jabdyqtalǵan jumys orny, arnaıy qurylǵylar jáne kitaptardy óz betinshe alyp, qaıtarýǵa arnalǵan «aqyldy sóreler» qarastyrylǵan. Zamanaýı tehnologıa kitap alý jáne qaıtarý úderisin oqyrmandar úshin barynsha yńǵaıly ári jyldam etedi.
Jańa mádenı keńistik aýdan turǵyndarynyń kitap oqýǵa degen qyzyǵýshylyǵyn arttyrýǵa, sondaı-aq olardyń mádenı jáne zıatkerlik damýyna qolaıly jaǵdaı jasaýǵa baǵyttalǵan.
Mekenjaıy: Túrksib aýdany, Qonaev atyndaǵy baý-baqsha kooperatıviniń aýmaǵy, 336/37.
Jumys ýaqyty: kún saıyn saǵat 09:00-den 20:00-ge deıin.
Qazirgi tańda Almatyda 32 qalalyq kitaphana jumys isteıdi. Onyń jeteýi táýlik boıy, ıaǵnı 24/7 rejıminde qyzmet kórsetedi.
Sonymen qatar turǵyndardyń kitapqa qoljetimdiligin arttyrý maqsatynda qalanyń saýda ortalyqtarynda kitap beretin eki pýnkt, al kelýshiler kóp jınalatyn oryndarda ózine-ózi qyzmet kórsetýge arnalǵan 32 avtonomdy kitaphana jumys isteıdi.
Jańa kitaphananyń ashylýy Túrksib aýdany turǵyndary úshin bilim men mádenıetti damytýǵa arnalǵan zamanaýı keńistik qalyptastyryp, kitaphana qyzmetteriniń qoljetimdiligin arttyrýǵa múmkindik beredi.
