Memleket basshysy Taıland Premer-mınıstriniń orynbasary – Syrtqy ister mınıstri Sıhasak Pýangketkeomen kezdesti, - dep habarlaıdy alnews.
Mártebeli meımanǵa iltıpat bildire otyryp, Memleket basshysy onyń elimizge sapary Qazaqstan men Taıland arasyndaǵy qarym-qatynastyń damýyna tyń serpin berý turǵysynan mańyzdy ekenin atap ótti.
– Sizdiń elińiz Ońtústik-SHyǵys Azıadaǵy jetekshi ekonomıkalardyń biri, Jahandyq Ońtústiktiń mańyzdy ókili ári halyqaralyq qoǵamdastyqtyń bedeldi múshesi sanalady. Qazaqstan Taılandpen ózara tıimdi yntymaqtastyqty tereńdetýge múddeli. Kelesi jyly elderimiz arasynda dıplomatıalyq qatynas ornaǵanyna 35 jyl tolýyn atap ótemiz, – dedi Qasym-Jomart Toqaev.
Memleket basshysy ekijaqty saýda-ekonomıkalyq baılanystar qarqyny údep kele jatqanyna nazar aýdardy. Buǵan ózara vızasyz rejım, týrıser aǵynynyń joǵary kórsetkishi jáne iskerlik baılanystardyń keńeıýi aıtarlyqtaı septigin tıgizip otyr.
– Qazaqstan – Taılandtyń Ortalyq Azıadaǵy eń iri saýda seriktesi. Óńirmen jalpy taýar aınalymynyń 70 paıyzy bizdiń elimizge tıesili. Áıtse de áleýetimiz áli jetkilikti dep sanaımyz. Qazirgi kezde Qazaqstan naryǵynda 55 taılandtyq kompanıa tirkelgen. Sizben birge elimizge úlken bıznes-delegasıa kelgen eken. Qazaqstan iskerlik baılanystardyń nyǵaıýyn quptaıdy ári Taıland kompanıalaryn elimizdegi ınvestısıalyq múmkindikterdi qarastyrýǵa shaqyrady, – dedi Prezıdent.
