Ekologıa salasyndaǵy jaýapkershilikti kúsheıtý jáne qorshaǵan ortany qorǵaý normalaryn Konstıtýsıalyq deńgeıde bekitý qajettigin Qyzylorda oblysynyń ákimi Nurlybek Nálibaev Konstıtýsıalyq reforma jónindegi komısıanyń toǵyzynshy otyrysynda kóterdi.
Komısıa otyrysynda ol ekologıalyq normalardyń óńirler úshin, sonyń ishinde ekologıalyq ahýaly kúrdeli Aral mańy aımaqtary úshin erekshe mańyzǵa ıe ekenin aıtty. Oblys ákiminiń pikirinshe, teńizdiń tartylýy qorshaǵan ortaǵa ǵana emes, aımaq halqynyń ómir sapasyna, densaýlyǵyna jáne áleýmettik jaǵdaıyna da tikeleı áser etip otyr.
«Aral teńiziniń taǵdyry – búkil adamzat úshin aýyr sabaq. Onyń saldaryn biz áli kúnge deıin sezinip kelemiz. Sondyqtan memlekettiń qolaıly qorshaǵan ortany qamtamasyz etý mindetin, azamattardyń ekologıalyq qaýipsizdikke qatysty quqyqtaryn Konstıtýsıalyq deńgeıde bekitý – ýaqyt talaby», – dedi Nurlybek Nálibaev.
Onyń aıtýynsha, jańa Konstıtýsıa jobasynda ekologıalyq aqparattyń ashyqtyǵyn qamtamasyz etýge jáne qorshaǵan ortaǵa zıan keltirgeni úshin jaýapkershilikti arttyrýǵa baǵyttalǵan normalar qarastyrylǵan. Bul ózgerister ekologıa salasyndaǵy memlekettik baqylaýdy kúsheıtip, óńirlerde aldyn alý sharalaryn tıimdi iske asyrýǵa múmkindik beredi.
Sonymen qatar, Nurlybek Nálibaev jańa Konstıtýsıa jobasy memlekettiń áleýmettik baǵyttaǵy rólin arttyrýǵa arnalǵanyn atap ótti. Qujat áleýmettik teńsizdikti qysqartýǵa, aýyldyq aýmaqtardy qoldaýǵa, jumyspen qamtýdy keńeıtýge jáne ınfraqurylymdy júıeli túrde damytýǵa quqyqtyq negiz qalyptastyrady.
Onyń sózinshe, bilim berý salasyn strategıalyq basymdyq retinde bekitý – adamı kapıtaldy damytýdyń basty tetigi. Bul jastardy suranysqa ıe mamandyqtarǵa daıarlaýǵa jáne olardyń áleýetin týǵan óńirlerinde júzege asyrýyna jaǵdaı jasaýǵa baǵyttalǵan.
«Elimizde adamı kapıtaldy damytý úshin bilim berýdi strategıalyq basymdyq retinde bekitedi. Biz jastardyń bolashaǵyna ınvestısıa salýdy, suranysqa ıe mamandardy daıarlaýdy, jas azamattardyń óz áleýetin týǵan jerinde iske asyryp, bolashaǵyn týǵan elmen baılanystyrýyna jaǵdaı jasaýdy tolyq qoldaımyz», - dep atap ótti oblys ákimi.
Sondaı-aq, baıandamasynda Nurlybek Nálibaev jańa Konstıtýsıa jobasy memlekettik basqarýdyń tıimdiligin arttyrýǵa, ókilettikter men jaýapkershilikti naqty ajyratýǵa jáne bılik organdarynyń halyq aldyndaǵy jaýapkershiligin kúsheıtýge baǵyttalǵanyn aıtty.
