Almatynyń Naýryzbaı aýdanynda bıyl «Halyq qatysatyn búdjet» baǵdarlamasy aıasynda jaıly ári zamanaýı qalalyq orta qalyptastyrýǵa baǵyttalǵan 35 joba júzege asyrylýda, - dep habarlaıdy alnews.
Olar qoǵamdyq keńistik pen balalar oıyn alańyn salýdy, syrtqy jaryqtandyrý men trotýar ornatýdy, júrginshi aımaqtaryn kóriktendirýdi, tik kógaldandyrýdy, jerústi júrginshi ótkelderin kógaldandyrýdy jáne avtomatty sýarý júıesin ornatýdy qamtıdy.
Aıaqtalǵan jobanyń biri – Aıtmatov kóshesindegi balalar oıyn alańy. Jumys barysynda eski oıyn qurylymdary men qorshaý alynyp, jańa negiz daıyndaldy, asfáltbeton jabyny tóseldi, zamanaýı shaǵyn sáýlet nysandary men qaýipsiz tartan jabyny ornatyldy. Nátıjesinde turǵyndar balalardyń belsendi demalysyna arnalǵan zamanaýı ári qaýipsiz keńistikke ıe boldy.
Kóriktendirý jumystarynyń taǵy bir baǵyty – Abaı jáne Alataý dańǵyly boıyndaǵy tik kógaldandyrý. Munda avtomatty sýarý júıesimen jabdyqtalǵan tik kógaldandyrýdyń 768 qurylymy ornatylyp, shyraıgúl men pelargonıa sekildi sándik gúlder egildi.
Sonymen qatar Abaı dańǵyly boıyndaǵy jerústi júrginshiler ótkelin kógaldandyrý jumysy jalǵasýda. Joba aıasynda gúl qumyralaryn, sándik modýldik konstrýksıalardy jáne shamamen 17,5 myń gúl egilgen tik kógaldandyrý júıesin ornatý kózdelgen. Búginde Abaı dańǵyly boıynda, Abaı dańǵyly men Áshimov kóshesiniń jolaıryǵynda jáne Dáýletkereı kóshesinde gúl qumyralary men sándik konstrýksıalardy ornatý jumysy aıaqtaldy. Sondaı-aq jerústi júrginshi ótkelindegi tik kógaldandyrýdyń modýldik júıesi tolyq ornatyldy.
«Halyq qatysatyn búdjet» baǵdarlamasy aıasyndaǵy jobalardy iske asyrý qalalyq ortany keshendi damytýǵa, kóriktendirý deńgeıin arttyrýǵa jáne Naýryzbaı aýdany turǵyndary úshin jaıly qoǵamdyq keńistik qalyptastyrýǵa yqpal etedi.
