Alataý aýdanynda 2026 jyldyń sońyna deıin jalpy syıymdylyǵy 4 300 oryndyq tórt mektepti ashý josparlanyp otyr. Bul týraly aýdan ákimdiginiń ókilderi aıtty.
Jańa oqý jylynda Zerdeli shaǵynaýdanyndaǵy 550 oryndyq №178 lıseı, Aqmarjan shaǵynaýdanyndaǵy 2 myń oryndyq №230 mektep jáne Ǵajaıyp shaǵynaýdanyndaǵy 1 200 oryndyq jańa mektep oqýshylardy qabyldaıdy. Al Qarasý shaǵynaýdanyndaǵy №160 mektepti bıylǵy qarasha aıynda paıdalanýǵa berý josparlanǵan.
Saıaly shaǵynaýdanynda táýligine 200 kelýshige arnalǵan otbasylyq dárigerlik ambýlatorıanyń qurylysy aıaqtaldy. Sondaı-aq munda balalardy úıirmelerge qabyldaý júrgizilip jatqan Inovasıalyq shyǵarmashylyq ortalyǵy salyndy.
Injenerlik ınfraqurylymdy damytý jumystary jalǵasýda. 2026 jyly Rahat–Mádenıet jáne Shapaǵat shaǵynaýdandarynda uzyndyǵy 177,8 shaqyrym bolatyn sý qubyry men káriz jelilerin paıdalanýǵa berý josparlanǵan. Bul shamamen 19 myń turǵyndy ınjenerlik qyzmettermen qamtamasyz etýge múmkindik beredi. Terekti shaǵynaýdanynda qosymsha 92,2 shaqyrym ınjenerlik jeli salynyp jatyr.
Sonymen qatar jalpy uzyndyǵy 61,1 shaqyrym bolatyn 95 kóshede ortasha jol jóndeý jumystary júrgizilýde. Uzyndyǵy 3,2 shaqyrym bolatyn Saın kóshesi aýmaǵynyń qurylysy aıaqtaldy. Boraldaı, Rahat–Mádenıet jáne Terekti shaǵynaýdandarynda jumystar jalǵasýda.
